Shillong, Jylliew 10: Ka Khasi Students’ Union West Jaintia Hills District Unit, ka KSU War Jaintia Circle ha ryngkat ka jingïatreilang bad ka bad ka Federation of Khasi-Jaintia and Garo People West Jaintia mynta ka sngi kala leit ban khynra ïa ka jingjyllei ki trok bar jylla kiba wan kit mar ha ki bynta ka War Jaintia.
Ha kane ka jingkhynra ki ar seng ki la lap ïa ka jingjyllei ki trok bar jylla ba kot palat ïa ka 200 tylli kiba wan kamai khlem biang ki kot ki sla naduh ki trading license bad kiwei de. Hadien ba ka seng ka la lap ïa kine ki trok bar jylla kiba wan kamai be-aiñ ka seng ka la pynher krad noh ïa ki sha ka jaka ba ki wan.
Ha kajingkren u President ka KSU West Jaintia Hills District Unit u Samla Laitphar Syngkrem u la ong ba kane ka jingïoh wan kamai sahuh ki bar jylla ka long ka jingknieh ïa ka lad kamai jong ki trai ri trai muluk.
U Samla Laitphar u la maham ruh ïa kino kino ki trai par maw ne ki nongkhaïi bad nong shalan maw sha Bangladesh ba kim dei ban ai jingïada ïa ki bar jylla kiba wan kamai khlem ki kot ki sla kiba biang bad ong maham ba lada jia eiei ïa kine ki bar jylla kito kiba wanrah ïa ki ki dei ban shim ïa ka jingbah khlieh jong ki.
U la kren bynñiaw ruh ïa ka jingbym ai shuh ka sorkar ïa ka ILP bad ong ba kum ka seng kan ym man thait ban shim hi ïa ki lad jingïada na ka jingwan ki mynder sha kane ka ri ba ieid. U la ong ba kum ka Jaidbynriew ba ym dei ban ai jaka rieh ïa ki bar jylla namar kin sa ialeh pyrshah yn da kila sngew khlain bor.
Haba kren bynrap, u President FKJGP West Jaintia Hills u bah Marhok Marboh u la pynrem jur ïa ka jingbym shim khia ka JHADC ban teh lakam ïa ki trok bar jylla kiba kamai khlem ki kot ki sla kat kum ka aiñ ba la pynkup bor ïa ka ha kaba ïadei bad ka jingwan khaïi pateng da ki bar jylla.
U la ong ba kane ka jingwan ki trok bar jylla ym tang ba ki la wan kamai khlem ki kot ki sla hynrei ka long ruh ka jingknieh ïa ka kamai kajih jong ki trai muluk ba im ja na ka kam ñiah trok.
