Shillong, Jylliew 15: U myntri ba dei peit ia ki kam shna surok ka sorkar pdeng u Nitin Gadkari haba kren ha ka jingialang jong ka North East India infrastructure Summit bad exhibition 2026 kaba la long ha Lariti performing Arts centre ha Shillong, la ong ba ka sorkar pdeng kan bei pisa T.40,000/- klur ban shna surok Guwahati sha Silchar.
Haba kren ha kane ka jingialang u myntri ka sorkar pdeng u la ong ba ka surok na Shillong sha Silchar kaba lah ban iaid saw tylli ki kali kan long 165 km ha ka jinglut kaba T.23,000/- klur tyngka kane ka surok kan pynlyngkot ia ka leit ka wan hapdeng ka Shillong bad silchar sanphew persent kane ka surok ka pyniasoh ia ka jylla Tripura, Mizoram bad Manipur lyngba ka Silchar.
Ban shna pynbha shuh ia ka surok balah ban iaid saw tylli ki kali na Jorabat sha duh Umiam kaba dei 66 km bad ka jinglut kan long T.8,500/- klur tyngka bad kane kan pynsted shuh shuh ia ka leit ka wan na kaba iaid mynta arkynta shiteng yn iaid noh tang shikynta, kane kan pynsted shuh shuh ia ka leit ka wan na Siliguri sha Guwahati nangta sha Shillong bad Silchar bad ka Northeast baroh kawei.
Ka surok na Darugiri sha Baghmara bad sha Dalu ka jingjngai kane ka surok kan long 137 km ha ka surok bah NH-217 bad ka jinglut ban shna ia kane ka surok ka long T.4,000/- klur tyngka ynda la dep kane ka surok kan kyntiew ia ka leit ka wan ha Garo Hills.
Kiwei ki surok ban iaid saw tylli ki kali na Pomlum sha Umtyngar kaba dei shibynta jong ka surok bah na Shillong sha Dawki, kiwei ki surok, kum ka Tura bypass, Pynursla bypass ka jingkieng Dhubri sha Phulbari ka jingjrong ka surok baroh ka long 450 km bad ka jinglut ka ban kit sha ka T.40,000/- klur tyngka.
Ia u myntri ka tnad shna surok ka sorkar pdeng la pdiang burom da u myntri rangbah ka jylla u Conrad K Sangma bad u symbut myntri rangbah ka jylla u bah Prestone Tynsong ha kad liengsiun ha Umroi da ka tem ka shad khasi tynrai.
