Shillong, Jylliew, 16: Mynta ka sngi ka tnad ialehkai ka sorkar jylla kala pynlong iaka jingialang ba ar sngi kaba tip kum ka Meghalaya Sports Conclave 2026 kaba la pynlong ha Courtyard by Marriot ha kaba ki rang bad ki thei ialehkai kila wan ban iashim bynta ha kane ka jingialang ha ka jingiadon lang ki dkhot ka Meghalaya State Olympic Association.
U Myntri Rangbah ka Jylla, u Conrad K Sangma haba kren ha kane ka jingialang u la iathuh ba ka sorkar jylla kala buh hakhmat iaki kam ialehkai kum kawei na ki mat treikam ba hakhmat eh, ym tang ba ki samla kin ioh iaki takma hynrei ba kin kham pyniar ha ka pyrkhat pyrdain.
Haba phaidien sha ka samoi treikam ka Sorkar naduh u 2018, u Conrad ula ong ba ka Sorkar kala sdang iaka samoi treikam ha kaba kala mad shibun ki jingeh hynrei wat hapdeng kine ki jingeh, ka sorkar kam shym la kynran dien hynrei kala tur shakhmat ban iakynduh iaki jingeh.
U la ong ha kine ki hynñiew snem ba la leit kum ka jingïaid lynti ban pynbeit ïaki jingeh ha ka rukom treikam bad ki bynta kiba kongsan jong ka synshar khadar, ka jingpynroi iaka sap, ka lynti iaid bad ban poi sha ka thong.
Kum ka sorkar ka sngewthuh ba ki samla ka jylla ki don hapdeng ka jingeh bad ka jingdukha mynsiem ia kaei kaba ki kwah ban kynjoh ha ka lynti iaid bad ha kaba sdang kum ka sorkar kala shim khia ia ki kam ialehkai namar baroh ia kwah ban ioh takma, hynrei kaba kongsan eh ka long ban pynlong iaki kam ialehkai ba kin iarap ban pynwandur iaka lawei bad ban pynwandur iaka jinglong jong uwei pa uwei u samla ka jylla.
Haba kren halor ka jinglong ki nongshongshnong ka Meghalaya, u Conrad ula pynpaw ba 18 lak ki dei ki samla ba hapoh 20 snem kaba mut 50% na ki nongshongshnong ka jylla ki dei kiba hapoh 20 snem ka rta.
Haba iadei bad ka jingpynlong iaka National Games ba 39, u Myntri Rangbah, u Conrad ula ong ba kane ka dei ka dak jong ka jingkiew namar ym shym lah ban mutdur ba ka jylla Meghalaya ka lah ban pynlong iaka National Games.
U Myntri ka kam ialehkai ka jylla, u bah Wailadmiki Shylla ruh ula kren ha kane ka conclave, kaba la khring iaki nongialehkai Olympics, ki riewshemphang ha ki kam ialehkai, ki heh ophisar bad ki heh ki hain kiba wan na kylleng ka Ri.
