Shillong, Jylliew 23: Bala ker sawdong da ki jaka puta ba itynnad jong ka Meghalaya, ka Shillong ka iai bteng ban long kum ka jaka pdeng kaba ioh ia ka jingiathuhkhana shaphang ka koit ka khiah, ka bha ka miat, bad ka jingtip jingshemphang jong ka shnong ka thaw.
Da kaba pynkhlain ia kane ka jinglong kongsan jong ka jingtip shaphang ka jingjied ia ki lad ai jingsumar bad ki nongsumar kiba tbit, ka Manipal Hospital EM Bypass, kaba long shi bynta jong ka Manipal Hospitals Group, ka la pynlong ia ka ‘Anveshana – Medical Education for Media’ ha Shillong mynta ka sngi.
Kane ka sienjam treikam kala lum lang bad wanrah ia ki doktor ba tbit ha ki liang bapher bapher bad kynthup ia U Dr. Sourav Datta, Director – Manipal Oncology Services & Senior Consultant – Head & Neck Oncology; Dr. Arindam Mondal, HOD & Senior Consultant – Surgical Oncology; Dr. Debdeep Samaddar, Associate Consultant Medical Oncology; bad Dr. Subhankar Chakrabarti, Consultant – Emergency ha Manipal Hospital EM Bypass.
Ki doktor kiba la iakren bad ki lad pathai khubor shaphang ki bynta ba kongsan jong ka jingnang kiew shaphang jong ki rukom ai jingsumar, ki rukom leh ban iada ia ki jingpang, bad ka jinglong kongsan ban shim ia ki jingsumar ha ka por kaba dang biang.
Kane ka prokram ka long ka jingsdang ia ka jingpyllait ia ka Media Privilege Card, kaba la ai ka jingtyrwa ia ki nongthoh khubor ban ioh ia ki lad jingsumar na ki Hospital jong ka Manipal kiba don ha kylleng, ryngkat bad ka jinghikai ban leh ia ka CPR ban hikai ia ki nongthoh khubor shaphang ki jingtip kiba sdang bad kiba kongsan na ka bynta ban iarap ia ka jingim ne ki Basic Life Support skills.
Haba kren shaphang ka jinglong kongsan ban lap kloi bad shim ia ki jingsumar kiba bha ha ka liang ka jingpang bampong, U Dr. Sourav Datta u ong, “Ka jingsumar ia ka jingpang bampong ha kine ki sngi ba mynta ka la nang kiew bha ha kaba ka jinglap ia ka jingpang ka long kaba iadei beit thik, ki jingsumar ruh ki long kiba iadei thik bad ka jingpang, ka jinglah ban leh ia ka jingpuid da kaba pyndonkam ia ki robot, bad kumjuh ruh ki jingsumar kiba ha ki liang bapher bapher.
Ka jingioh ia ka jingtip, ka jingkhmih bniah kaba man la ka por, bad ka jingshim ia ki lad jingsumar ka long kaba donkam bha, khamtam ha ka thain ha kaba ka jinglap ia ka jingpang ka slem kaba la ktah bha ia ki briew.”
U Dr. Arindam Mondal u la bynrap, Ka jinglap kaba kloi ia ka jingpang bad ka jingshim ia ki jingsumar ha ka por kaba kloi bad ka jingleit iakynduh ia ki doktor ki long kiba donkam bha na ka bynta ban sumar ia ka jingpang bampong.
Ka jinglah ban ai ka jingsumar kaba katkum ka juk ba mynta ban leh ia ka jingpuid na ka bynta ka jingpang bampong, kaba kynthup ia ka jingpuid ka bym da pynshitom eh bad rukom sumar kaba iada ruh ia ki dohjem, kaba la iarap ban nang pynbha ia ka rukom sumar ia ki nongpang bad ka jingkhiah krad jong ki.
Haba kren shaphang ki lad ki lynti ban sumar ia ka jingpang bampong, U Dr. Debdeep Samaddar u ong, Ka rukom sumar ia ka jingpang bampong ha kine ki sngi ba mynta ka donkam ia ki bynta bapher bapher kaba don lang ia ka chemotherapy, ka rukom sumar kaba dei thik beit ia ka jaka ba pang ne ka targeted therapy, ka immunotherapy, ki dawai kiba dei thik beit ia ka jaka ba don jingshitom bad ka jingkyrshan ha ka rukom sumar.
Haba ai ia ka jingpynsngewthuh paidbah shaphang ka jingleit ban peit bniah ia ka jingpang bad ka jingjied ia ki rukom ai jingsumar kiba thymmai ka long kaba donkam haduh katta katta ban pyniasoh hapdeng ki jingsumar kiba bit ba biang bad ka jingdonkam jong ka shnong ka thaw.”
Haba kdew shaphang ka jingdonkam jong ka jingsngewthuh shaphang ka CPR, u Dr. Subhankar Chakrabarti u ong, Ki khyndiat minit hadien jong ka jingshitom sangeh ka jingtied u klongsnam ki long kiba kongsan haduh katta katta.
Ka jingsngewthuh shaphang ka CPR bad ka jinglah ban ai jingiarap ia ka jingim ne ka Basic Life Support ka lah ban pyllait im ia ki briew, bad ka jingai jinghikai ia ki shnong ki thaw ka long kaba donkam bha ban pynkhreh ia ki nongshong shnong ba kin lah ban leh eiei lada jia kum kitei ki jingjia.
Lyngba ka Anveshana, ki Manipal Hospital ki iaibteng ban ai ka jingtreikam kaba radbah ban don ka jingiakren shaphang ka koit ka khiah, ka jingiatreilang bad ki shnong ki thaw, bad ka jingpynkup bor ia ki nongshong shnong ha kylleng ki bynta jong ka thain shatei lam mihngi ka ri India da ka jingai ka jinghikai shaphang ki lad ai jingiada ha kaba iadei bad ki jingpang jingshitom, ki rukom sumar kiba katkum ka juk kaba mynta bad ka jinglong ba la pynkhreh.
