Shillong, Jylliew 23: U myntri ba dei peit ia ka General Administration department ka sorkar jylla u bah Sosthenes Sohtun u la leit ban jurip ia ka Meghalaya House kaba don ha Vellore kaba thied ka sorkar jylla ban pynioh jaka sah ia ki briew ka jylla baleit phah sumar sha katei jaka ka jylla Tamil Nadu.
Ha kane ka jingleit na ka liang jong u myntri u la khot ia ka jingialang bad ia ki nongtrei ha Meghalaya House ha Vellore bad ha dien ka jingiakren la shem wat ba ki engineer jong ka PWD kila ong ba kane ka iing kala rim palat kam myntoi shuh ban maramot ia ka.
Halor kane ka sorkar kala shim ia ka rai ban tei thymmai noh ia ka Meghalaya House ha Vellore bad ia mynta ban ai ka jingshakri ia ki paidbah ka jylla kiba leit sha sumar ha Christian Medical College Vellore ka sorkar kan shim wai noh shipor ban dup ioh shna thymmai noh ia ka Meghalaya House.
Haba shim tang ia ka jingkhien ha u snem 2025 ki briew na kane ka jylla kiba la pyndon kam ia kane ka iing sorkar ha Vellore ban leit sha sumar ha Christian Medical College Vellore ki don haduh 212 ngut, ia kane ka iing sorkar la plie ha u snem 2000.
