Shillong, Jylliew 23: U Myntri Rangbah ka jylla Meghalaya, u Conrad K. Sangma mynta ka sngi u la pynlong iaka jingialang ha State Guest House, Taraghar, Shillong, na ka bynta ban bishar bniah iaki mat ba iadei halor ka jingai bording, bai bording bad ka jingeh ba la pynpaw da ki paidbah ha ki jaka ba pyniaid da ka SAI Computers ba hap hapoh ka Distribution Franchisee jong ka jingpyn biang da ka Meghalaya Power Distribution Corporation Limited (MePDCL).
Ha katei ka jingialang, ka don u Chairman-cum-Managing Director jong ka MeECL, u Sanjay Goyal, ki nongtrei jong ka MePDCL, nongmihkhmat ka SAI Computers bad kiwei kiwei ki heh ba dei peit.
Ha kane ka jingialang, na ka liang jong ka SAI Computers, ka la kren shaphang ka rukom treikam ha kito katto katne ki jaka, da kaba iathuh shaphang ka jingeh kaba ki shem na ka jingtreikam barim, kynthup iaka jingsniew jong katto katne ki meter, ki mar phew kiba la rim, ka jingsniew u transformer, ka jingbym don meter bad kiwei kiwei ki mat ba iadei bad ka bai bording.
Ki heh nongtrei ki la dep pynbna ia u Conrad ba ka jingdon jong ki nongshim bording ha ki katto katne ki jaka ka dei ba hap ha ka thup jong ka Below Poverty Line (BPL) bad ba bun ki meter ba la dep ai ha ki, kim shym la treikam ha ka por ba pyntreikam. Ki la bynrap ba yn sa shna iaki meter ba la sniew bad buh da kiwei, pynbha iaki jingtei network bad kiwei kiwei ki jingeh kiba ktah iaka jingsam iaka bording.
Haba iakren shaphang ka jingujor ki paidbah halor ka jingkiew ka bai bording, u Conrad u la ban jur da kaba ong ba ka jingngeit bad ka jingshaniah u paidbah ryngkat ka jingai kiba biang iaki jingshakri kiba donkam tam ka dei ban long ka jinghikai bakhraw tam eh iaka sorkar.
“Ka bording ka dei kawei na ki jingpyntreikam na ka bynta jong ki paidbah kaba ktah bha ha man ki thliew iing briew man u bnai. Lada ki briew kila dep siew iaka bai bording kaba kiew hynrei ka ju lip bording khah khah, kin sngew bitar. Ngi dei ban sngewthuh iaka jingeh ki paidbah bad treikam mar mar,” ong u Conrad.
U Chairman-cum-Managing Director.jong ka MeECL, u Sanjay Goyal, u la dep pynbna ha kane ka jingialang ba la dep pynbiang iaki projek jingpynroi kiba hap hapoh ki skhim bapher bapher, kynthup iaka Revamped Distribution Sector Scheme (RDSS). U la ong ruh ba donkam ban kylliang noh da kiba thymmai iaki meter ba la rim bad sniew, pyn thymmai iaki transformer bad kiwei kiwei ki mat ba shem jingeh ki paidbah ha ki jaka ba shah ktah.
La pynkut ia katei ka jingialang da kaba bthah kam iaka SAI Computers bad MePDCL ba kin trei shitom ban pynbha iaki jingtei, pynkhlain bad pyniar iaki prokram pynsngewthuh paidbah bad iada iaki nongthied nongpet.
