Shillong, Jylliew 25: U nongialam jong ka seng Congress u bah Manuel Badwar u la ong ba ka tnad pule puthi ka hap hapoh jong ka Concurrent List kaba mut ka sorkar pdeng bad ka sorkar jylla ki don lang ia ka jingkitkhlieh.
Haba kren ha ki lat pathai khubor ha Congress Bhavan Shillong la ong ba kaei kaba jia ha ka jylla Meghalaya, ka sorkar jylla ka leh ha katta ka rukom ba kin Shaniah ha ka sorkar pdeng, ka jingpynlut ka kham bha hynrei kam shym pynpaw ia ki dak ki shin.
U nongialam ka congress u la ong ba kane ka jingbym seisoh ka daw ka long ba ka sorkar jylla kam shym la pynleit jingmut ha kaei kaba ka dei ban peit dei na kane ka daw ba la pynsepei ia ka por namar ia ki nonghikai la pynbun kam da kiwei pat ki kam.
Haba la pynbun kam da kiwei ki kam nalor ki kam hikai kaba ki dei ban pyndep namar ka sorkar ka kwah ban ioh ia ka jingkhein bad ka jingkhien ka kylla na ka por sha ka por ka long ba la shu ia mareh khlem poi shano shano.
Haba don ia kane ka rukom pyniaid ia ka pule puthi kaba kum kane bad ia ki nonghikai ym shym la btin lynti ia ki ha ka rukom kaba biang, dei na kane ka daw ba ka tnad pule ka jakhom bad kan dang iai jakhom, ka sorkar kan hap ban shim khia namar ka sorkar pdeng kam don jingkit khlieh.
