Shillong, Jylliew 25: Kum shi bynta ki prokram ba la pynlong baroh shi taiew ban pyndon burom ia ka International MSME Day, kaba ju rakhe man la u snem ha ka 27 tarik u Jylliew, ka Reserve Bank of India (RBI), Shillong, ka la pynlong ia ka Awareness Camp na ka bynta ki nongseng kam MSME ha State Convention Centre, Shillong, mynta ka sngi.
Kumba 150 ngut ki nongseng kam seng jam kiba la don lypa bad kiba kwah ban seng kam seng jam na kylleng ka jylla Meghalaya ki la iashim bynta ha kane ka prokram.
Ia kane ka prokram la plie da u Bah Olden Nongpluh, General Manager (Officer-in-Charge), RBI Shillong. U Bah Moon Lander Wanshnong, Director, Tnad Commerce and Industries, Sorkar Meghalaya, u la iadonlang kum u kongsan.
Ki heh ophisar na ka tnad Commerce & Industries Centre (DCIC), NABARD, SIDBI, MSME Development & Facilitation Office (MSME-DFO), Meghalaya Rural Bank, State Bank of India, HDFC Bank, Canara Bank bad kiwei kiwei ki jaka treikam kiba don bynta ha kane ka kam ki la iadonlang.
Haba pdiang sngewbha ïa ki nongïashim bynta, u Deputy General Manager, ka RBI, u la kren shaphang ka jingdonkam ban wanrah ïa ka jingsngewthuh kaba kham bha hapdeng ki nongseng kam ha kaba ïadei bad ki lad jingïarap pisa bad ki lad pynroi bapher bapher kiba don na ka bynta ka kam MSME.
U la batai ia ki sienjam ba kongsan jong ka RBI kiba thmu ban pynkhlain ia ka jingai ram ia ki MSME, kynthup ia ki thong Priority Sector Lending, ka Trade Receivables Discounting System (TReDS), Unified Lending Interface bad ki sienjam kiba kyntiew ia ka jingpynskhem bad ka jingioh ram ha ka por kaba biang.
U la pynshlur ia ki nongseng kam seng jam ban pdiang ia ka rukom siew digital, ban pynneh ia ka jinglong ryntih ha kaba iadei bad ka kam shim ram bad ban pdiang ia ki rukom buh jingtip digital.
Haba ai jingkren ha kane ka jingialang, u Bah Olden Nongpluh u la ban jur ia ka bynta kaba kongsan ba ki MSME ki don ha kaba kyntiew ia ka ioh ka kot, ban pynmih ia ki lad ioh kam bad ban kyntiew ia ka jingseng kam seng jam.
Haba batai ïa ki MSME kum ki “jaka sumar ia ka jingseng kam seng jam”, u la kyntu ïa ki samla nongseng kam seng jam ban pdiang ïa ka jingsaindur thymmai bad ban noh synñiang sha ka jingkiew ka ioh ka kot jong ka Meghalaya.
U la ban biang ïa ka jingkut jingmut jong ka RBI ban pynsuk ïa ka jingïoh ram kaba la buh ryntih lyngba ka jingïatreilang kaba jan bad ka Tnad MSME, ki Sorkar Jylla bad Sorkar Pdeng, ki jaka ai ram bad ki nongpeit ia ka kam.
U la ban jur ruh ïa ki sienjam ba dang shen kum ka jingkyntiew ïa ki pud jong ki ram ba lah ban ioh khlem jingbuh bynda haduh T.20 lak, ka jingpyllait ïa ka jingsiew lypa ïa ki ram MSME kiba lah ban ioh ia kane bad ki lad ban pynsted ïa ki jingpyllait ia ka pisa ba la shim kum ka ram.
Ha ka jingai jingkren jong u, u Bah Moon Lander Wanshnong u la ban jur ïa ki sienjam jong ka Sorkar Jylla ban kyntiew ïa ka jingseng kam seng jam lyngba ka jingkyrshan ha ka por ba dang sdang ia ka kam, ka jingpyniasoh bad ki ïew ki hat, ki sienjam ban kyntiew ïa ki sap, ki jaka pynsuk bad ki skhim ai jingkyrshan bapher bapher na ka bynta ki MSME.
Haba ban jur ïa ka jingdonkam ban ai ram ha ka por kaba biang bad kaba jem dor, u la ong ba ki MSME kidei ki bor ba kongsan jong ka jingkylla ha ka imlang sahlang bad ka ioh ka kot jong ka Meghalaya.
U la ïaroh ïa ka sienjam jong ka RBI ban pynïasoh lang ïa ki nongshim bynta ha ka kawei ka rynsan ban kyrshan ïa ka kam seng kam seng jam jong ka Jylla.
Ha kane ka prokram la don ruh ki jingialang iamir jingmut da ki ophisar na ka RBI, DCIC, MSME-DFO, SIDBI, NABARD bad ki bank kiba ïashim bynta halor ki sienjamjong ka RBI, ki skhim jong ka Sorkar Pdeng bad Sorkar Jylla, ki jingai jingshakri jong ki bank, ki kyndon ban ïoh ïa ka jingïarap bad ka jingkyrshan jong ki jaka treikam ia ki MSME.
Ki nongseng kam seng jam kiba la ioh ia ka jingjop ki la ïasam ruh ïa ki jingshem bad ki jingsngewthuh jong ki halor ka jingpynkhreh ia ka rukom trei kam, ka jingpynheh bad ka jingpyniasoh bad ki ïew ki hat, kaba ai mynsiem ïa ki briew kiba kwah ban seng kam seng jam.
Ki nongiashim bynta ki la ai jingiaroh ia ka sienjam bad ki la iashim bynta shitrhem ha ki jingiamir jingmut ha ki jingialang. Ka Awareness Camp ka la pynskhem biang ia ka jingshimkhia lang jong ki nongshim bynta ban pynkhlain ia ka kam MSME, ban kyntiew ia ka jingkynthup lang ia baroh ha ka kam pisa tyngka bad ban pynshlur ia ka jingseng kam seng jam ha Meghalaya.
