ShillongJylliew 25: Ka Rashtriya Raksha University (RRU), ka jaka treikam kaba donkam ia ka ri hapoh ka tnad kam pohiing jong ka Sorkar India, ka khot ïa ki aplikeshon na ki kandidet kiba biang ban ïoh rung ha ki prokram jingpule bapher bapher ha Pasighat Campus jong ka ha Arunachal Pradesh na ka bynta ka Academic Session 2026–27.
Ka skulbah kadei kaba trei borbah na ka bynta ka kam pule puthi, ka jingwad bniah, ka jingai jinghikai bad ka jingkyntiew ia ka bor treikam ha ki bynta ba iadei bad ka jingshngain jong ka ri, ki kam pulit, ka jingshngain hapoh ri, ka jingshngain ha ki kam cyber, ka forensic science, criminology bad kiwei kiwei ki jingpule kiba iadei bad kane.
Ka jaka treikam jong ka, ka don ha Gandhinagar, Gujarat, bad ka la seng ia kiwei kiwei ki jaka pule ha ki thain bapher bapher ha kylleng ka ri.
Ka Pasighat Campus, kaba la plie ha u bnai Jymmang 2022 ha East Siang District jong ka jylla Arunachal Pradesh, ka dei ka regional campus kaba nyngkong eh jong ka Skulbah bad ka la paw kum ka jaka ba kongsan na ka bynta ki jingpule kiba iadei bad ka jingshngain bad ki kam ba kongsan ha ka thaiñ shatei lammihngi.
Kane ka jaka pule ka pynbiang ia ki jingpule ba kyrpang lyngba ki tnad Police administration, ka Physical Education bad Information Technology. Kine ki kynthup ïa ka M.A. ha ka Police Administration and Strategic Management (MAPASM), B.A. in Security Management (BASM), Diploma in Police Science (DIPS), Post Graduate Diploma in Strength and Conditioning (PGDSC), bad Post Graduate Diploma in Cyber Security and Digital Forensics (PGDCSDF).
Ha ki snem kiba la leit noh, ki samla kiba la pyndep ia ki jingpule na kane ka skul bah mynta ki trei ha ki kam pulit ha ki jylla bapher bapher, Central Armed Police Forces, ki kam ai jinghikai, ki kam kompeni bad ka kam ïalehkai, kaba pyni ïa ka jingpynleit jingmut jong ka jaka pule halor ka jingtbit ha ka kam bad ka jingtei ïa ka ri.
Ka RRU ka treikam hapoh ka rukom treikam ICTREE kaba kyrpang kynthup ïa ka Jingsaindur thymmai, ka jingkyntiew ia ka bor treikam, ka jingai jinghikai, ka jingwad bniah, ka jingpule da ka jingthmu ban kyntiew ïa ki riewshemphang kiba tbit bad ki nongïalam ha ki por ban wan ha ki bynta jong ka jingshngain, ki jingpule ba kongsan, ka jingshngain ha ka kam cyber bad ka sport sciences.
Ki samla kiba kwah ban pule ha kane ka skul bah ki lah ban ioh ia ki jingtip ba bniah ha kaba iadei bad ki kyndon ban ioh rung bad ki tarik ba kongsan lyngba ka website jong ka Pasighat Campus lane da kaba leit sha ka ophis jong ka campus. Ki aplikeshon na ka bynta ka Academic Session 2026–27 ki dang plie mynta.
