Shillong, Jylliew 27: La pynlong iaka prokram ba shi taiew, kaba la tip kum ka jingai jinghikai ban sumar ban bat iaka mynsiem, jingiarap ba nyngkong ban pynjem iaka jingshitom bad ka jing eksamin ia bun jait ki jingpang ha Conference Hall, Police Reserve, Shillong, da ka ophis treikam jong u District Medical bad Health Officer (DMHO), East Khasi Hills, ha ka jingiatreilang bad ka ophis jong u Addl. Superintendent of Police (Traffic), East Khasi Hills bad ka Police Hospital, Police Reserve, Shillong.
Kane ka prokram ka thmu ban pynkiew iaki sap ban pynlait im iaka mynsiem briew da ki pulit pyniaid kali bad ki nongshong shnong ka Home Guard, ha kaba kane ka jingai jinghikai ka pynioh ban lah ai ka jingsumar mar mar ha ka por ba don ki jingshitom ba kyrkieh, kum ka jingmynsaw na ka aksiden ha surok, ka jingkylla kynsan ha ka jing sangeh treikam ki thied dohnud, jingjnang hapoh ryndang, ka jingmih snam palat pud, jingpait shyieng bad kiwei kiwei ki jingjia ba lah ban shim noh iaka jingim briew hashwa ban poi ki doktor.
Kum shi bynta jong ka prokram, iaka jingleh test iaka jingpang bym ia bit, napdeng ki nongiashim bynta, la dep pynlong na ka bynta ban lap noh iaka jingshitom kham kloi bad ban teh lakam iaka jingpang BP, shini bad kiwei kiwei ki jingpang bym ia bit.
Kane ka jingshim khia ka pyni iaka jingngeit skhem jong ka tnad ka koit ka khiah bad ka tnad pulit ban pynkhreh lypa na ka bynta ki por ba donkam kyrkieh The initiative reflects the commitment of the Health Department and the Police Department towards strengthening emergency preparedness katba dang pynkiew iala jingkoit jingkhiah bad ka jingbha jingbiang ki nongtrei shakhmat.
Ha ka jingbteng ia kine ki jingthmu ban pynroi iaka bor, ka prokram ba shi sngi halor ka jingai jinghikai ban sumar nyngkong ban pynjem iaka jingshitom bad jinghikai ban bat iaka mynsiem briew, la long ha ka 26 tarik, Jylliew 2026 na ka bynta ki nonghikai bad samla pule jong ka St. Edmund’s Higher Secondary School, Shillong.
Kane ka prokram ka pynleit jingmut ban pynmih iaka buit ban pynim briew, kynthup iaka jingtip kumno u klongsnam u sangeh treikam, ka buit pynhiar mynsiem da ka kti, ka buit kumno ban sumar haba dkut mynsiem bad kiwei kiwei ki jingjia kynsan ba kyrkieh.
Kane ka thong ka dei ban ai bor iaki nonghikai bad ki khynnah skul ba kin lah ban ieng rasong bad pyntreikam tyngeh ha ki por ba donkam kyrkieh, katba dang ap iaka jingiarap na ki nongsumar kiba la pyntbit.
