Shillong, Jylliew 30: U Myntri Rangbah Conrad K Sangma mynta ka sngi ula pyllait paidbah ia ka “Achievers of the Month” Programme, ka prokram flagship kaba thmu ban ai jingithuh ia ki briew kiba treikam bha bad ban wanrah ia ka dustur sengkam sengjam ha kylleng ka Jylla Meghalaya.
Ia kane ka prokram la pynwandur ban ai ka rynsan ia ki nongjop na ki kam bapher bapher ba kin lah ban iasam jingtip ia ki lynti iaid jong ki, ai mynsiem ia kiwei, bad pyni pyrthei ia ki jingmyntoi jong ki prokram ka Sorkar ha kaban wanrah ia ka jingroi bad ki buit treikam thymmai.
Haba pyllait ia ka prokram, u Myntri Rangbah ula pynpaw ba katba ka Sorkar ka shim ia ka bynta ban long ka nongiarap da kaba wanrah ia ki policy, ki jingtei bad ki rukom ai jingkyrshan, dei ka jingseng kam sengjam kaba pyntyllun ia ka jingkiew ha ka ioh ka kot.
“Ka Sorkar ka thaw ia ka nongrim, hynrei ka dei ka jingsengkam sengjam kaba pynlong ia ka ioh ka kot ban kiew” ula ong, haba bynrap ba “ka jingsengkam sengjam ka dei ka nongrim jong ka jingpynmih ia ki lad kamai kiba neh bad ka jingkiew ha ka ioh ka kot”.
Haba ban jur ia ka thong ha lyndet kane ka prokram, ula pynpaw ba ka prokram ka thmu ban pynkut noh ia ki prokram ba thmu tang ia kawei ne ar ki kam bad ban wanrah ia ki khana ka jingjop shakhmat eh. “Ngi kwah ban iasam ia ki khana jingjop jong phi bad ka pyrthei. Kaei kaba lah ban long kaba suk eh ia phi ka dei ka jingai mynsiem ia kiwei pat” ula kynthoh.
U Myntri Rangbah ula pynbna ruh ba u bnai Naitung yn dei u bnai kyrpang jong ki nongsengkam sengkam, da kaba pynlong ia bun ki jingiakren, ki rynsan iathuh khana, bad ki prokram pynphriang paidbah lyngba ki social media kiba thmu ban pynpaw pyrthei ia ki lynti iaid jong ki.
Ha kane ka jingialang, ki nongsengkam sengjam bad ki nongjop kin iasam khana halor ki jingshem jong ki, kin kren halor ki jingeh ba ki iakynduh, ki jingialeh bad ka jingkiew shaphrang.
Kila pynpaw ia ka jingsngewnguh ia u Myntri Rangbah namar ka jingpynlait ia kane ka prokram kaba ai jingithuh ia ka jingtrei shitom jongki bad ai mynsiem ia ki nongsengkam sengjam.
Ula ai mynsiem ruh ia ki nongsengkam sengjam ba kin iai neh ha ki jingthmu jong ki, bad pynpaw “Wat ailad iano iano ruh ba kin ong ia phi ba phin nym jop. Ka dei ka kamram jong phi ban pyni ba ki bakla”.
Haba pynpaw ia ki jingpynleit jingmut jong ka Sorkar ha ka sengkam sengjam ha ki bynta bapher bapher, ula kdew ba ki kabu ki don ha ka kam ialehkai, ka rep ka riang, ka put ka tem bad kiwei ki kam kiba dang mih thymmai.
Ula ai nuksa ia ki prokram ba kyrshan ia ki nongrep, ki barikor bad ki nongialehkai, haba pynpaw ba man ki bynta ki don ia ki lad ban sengkam bad thaw kam.
U Myntri Rangbah ula ai jingiaroh ruh ia ka bynta jong ka PRIME bad ka jingleit jong ka sha ki jaka nongkyndong ban wanrah jingkylla ha ka sengkam sengjam, iasam ia ki nuksa jong ki briew kiba la kiew bha ha ki kam ba ki trei na ka jingsdang kaba rit ban poi sha ki iew jong ki jaka sor kiba heh.
Ka “Achievers of the Month’ Programme kan, ha ki bnai ban wan, pyni ia ki nongjop na ki bynta bapher bapher kynthup ki kam ialehkai, ka rep ka riang, ka pule dangle, ka jingshakri paidbah, da ka thong ban tei ia ka jingialeh (movement) ha ka Jylla baroh kawei ban ai mynsiem ban ai jingithuh.
Ha ka jingialang mynta ka sng, 50 ngut ki nongsengkam kiba wan na kylleng ki bynta ka Jylla kila shah pynkup burom namar ka jingjop jong ki ha ka sengkam sengjam.
