Shillong, Jylliew 29: Ka sorkar pdeng naduh ba wan ka khlam Covid-19 kala pynbna ban sam ei ia u khaw ration sha baroh ki longiing kiba don ia ka kard ration baduk (BPL) bad kane kan dang iai bteng haduh u snem 2028.
Katkum ki khubor kiba la ioh da u SP News Agency haduh u bnai Lber mynta u snem kiba don ia ka kard ration baduk ki ioh 35 kilo u khaw hynrei kaba pyn lyngngoh ia ki nongioh khaw ba mynta la ar bnai u Iaiong bad u Jymmang ki ioh sa tang 30 kilo u khaw.
Haba la ioh ban iakren bad katto katne kiba ioh khaw ration kila iathuh ba kane ka jingbthah yn sam 30 kilo u khaw ka dei hadien ba la leh ia ka Biometric, ka jingpynshisha jong kiba don kyrteng ha ka kard ration da kaba shon kti ryngkat ka jingdon lang u Aadhar ha ki mashin ba don bad ki nongsam khaw ration.
Kane ka jingpynkylla ia ka rukom ai khaw mynta ar bnai kaba kiba bun ki dang ioh ia ka bhah jong u bnai Jymmang mynta u bnai Jylliew kila sngew kyndit bad kim sngewthuh shuh ia kane ka jingleh ia kaba la pynduna da san kilo u khaw ha kine ki ar bnai kiba la dep sam ia u khaw.
