Shillong, Jylliew 29: Ka Khasi Students’ Union (KSU) West Khasi Hills District Unit, ha ka sngi Thohdieng jong ka 26 tarik u Jylliew, 2026, ka la pynlong ïa ia ka jingïalang ba kyrpang na ka bynta ban pynshlur bad pynphrang ïa ka mynsiem ieid ri hapdeng ki khun samla ka Jaidbynriew. Ïa kane ka jingïalang la pynlong ha Bishop Hall, ha New Nongstoiñ.
Ka phang pdeng ba ia kren ha kane ka Sngi ka long, “Na shlem te ngin sdang ba ka ri kan long kyrpang”. Ha kane ka sngi la don lang ki nongïalam jong ka KSU Central Executive Council kiba kynthup ïa u General Secretary, u Samla Reuben Anderson Najiar, u Samla Sandy Sohtun asst. Organising Secretary, u Samla Gary Mawlieh Office Secretary.
Nalor kine ki nongïalam ba mynta ka seng, la ïa don ryngkat lang ruh ki nongïalam barim kiba kynthup ïa u Samla Lambokstarwell Marngar, President barim KSU, u Bah Samuel B. Jyrwa, Chairman ka NESO bad President Barim ka KSU bad u Bah Danny M. Khyriem, Vice President Barim ka seng.
Ha kane ka jingïalang na ka liang ki Nongialam ki la kyntu bad pynrhem halor ka jingdonkam ban pynbiang bad pynkhreh naduh la ïing khnang ban kyntiew bad pynlong ïa ka ri bad ka Jaitbynriew kaba phyrnai bad kaba riewspah ha ki liang baroh.
Haba kren, u vice president barim ka KSU, u bah Danny M. Khyriem, u la kyntu ïa ki samla baroh ba kin long kiba ïa ieid kiba ïa tylli bad ki ba aiti ïa ka ban shakri ïa ka Ri bad ka Jaitbynriew lyngba ka KSU.
U bah Danny u la buh ka jingkylli “Hato kam lah dei sa ha ki tyrpeng ki dkhot ba mynta ban ïarap ban bah lem ïa ka lyngkor,” u la ong ruh ba ka jingïaleh kan nym pat kut, khamtam kum ïa ka ILP kaba long kawei na ki mat ba kongsan eh jong ka seng.
u bah Danny u la pynkynmaw ba ki kum ki samla bad kum ka jaidbynriew hi ba dei ban bud ïa ka nuksa jong ka Meiieit Spilty Lyngdoh Langrin bam kwai ha dwar u blei kiba la long ki nongmuna ha ka jingïakhun na bynta ka hok longtrai ha la ka Ri.
