Shillong, Jylliew 05: Ka Ramakrishna Mission Vivekananda Cultural Centre (RKM VCC) kaba don ha Quinton Road, ka la pynlong ïa ka jingïalang jong ki Samla kaba la neh baroh shisngi ha ka sngi Saitjain, kum ka jingrakhe ïa ka jingdap 125 snem jong ka jingwan jngoh ba kongsan jong u Swami Vivekananda sha nongbah Shillong.
Kane ka jingialang kaba la sdang naduh ka por 9:00 baje mynstep haduh ka por 4:00 baje janmiet, ka la khring ia ka jingiashim bynta kaba iphuh iphieng na jan 40 tylli ki skul ha kylleng ka thain, kaba pynleit jingmut ha kaba pynkup bor bad ai mynsiem ia ki samla ka jylla Meghalaya.
La sdang ïa kane ka step da ka jingrwai ia ka National Anthem bad ka Vande Mataram ba la rwai da ka Shillong Academy, bud sa ka jingthang ïa ka sharak, ka jingkren Vedic na ka Vivekananda Youth Forum, bad ka jingkren pdiang sngewbha da u Swami Hitakamanandaji Maharaj, Secretary ka Ramakrishna Mission Shillong.
Ki Mat ba kongsan jong ka jingialang kila ia kren ia ka jingkoit jingkhiah ha ka met bad ka bor pyrkhat: U Professor Ayon Bhattacharjee (NIT Meghalaya) u la ïalam ïa ka jingleh yoga, bud sa ka jingpyrkhat jylliew ba la ïalam ban tei ïa ka bor ha ka mynsiem.
Ki Jingkren ai mynsiem: U Swami Bodhamayananda Ji Maharaj (Adhyaksha, Ramakrishna Math, Hyderabad) u la ai artylli ki jingkren ai mynsiem kiba khlain shaphang ka jingim kaba don jingthmu bad ka jingkhlain.
Ka Jinglong nongialam & Ki Sur jong ki Samla Pule: Ka bynta ba iadei bad ka “Youth Speaks” ka pyni ïa ki kam jong ki samla pule, la don ruh ki bynta shaphang ka jingtbit ha ka kam nongïalam da u Swami Aryeshanandaji Maharaj bad ka jingkren ba pynshitrhem da ka Rifiness Warjri.
Ki Jingshem halor ka Jingshakri Paidbah: U Bah Wanshai Shynret, Deputy Director (Administration), NEIAH, u la ïasam ïa ki jingïalam ba kordor ha ka thaiñ halor ka jingkut jingmut, bad ban jop ïa ki jingeh ha kane ka juk mynta.
Ka jingïakren bad ki khlur ha ka kam ialehkai: U kapten barim jong ka kriket jong ka ri India bad u khlur jong ka World Cup jong u snem 1983, u Krishnamachari “Kris” Srikkanth u la iadon bynta lang na Chennai lyngba ka bor internet na ka bynta ka jingïalang kylli jingkylli bad jubab kaba shithrem bad ki samla pule.
Ki Jingpyni ia ka Kolshor: Ki samla nongrwai na ka thain ki la pyni ia ki jingrwai kiba ai mynsiem, ka skit kaba itynnad shaphang u Swami Vivekananda, bad ki jingrwai tynrai kiba sngewtynnad.
Ka kynhun pynkut jong ki riew shemphang: Ka kynhun ïakren kaba la pynïaid da u Swami Bodhamayanandaji, u Swami Aryeshanandaji, bad u Bah Wanshai Shynret ka la jubab ïa ki jingkylli jong ki samla pule da ka jingshai bad jingjai jai. Ki jingiakop ba iadei bad ka kolshor ba man la u snem ki dang iaid shakhmat.
Ki nongpynïaid ki la ban jur ba ki jingïakop ba iadei bad ka kolshor ba man la u snem ki la sdang ha ka 27 tarik u Jylliew, 2026. Katba ka jingwan sha ka jingïalang mynta ka sngi ka long tang na ka bynta ka kynhun nongmihkhmat ba la jied na man ka skul.
Ym don jingkhang ïa ka jingpynrung kyrteng na ka bynta ki jingïakop kiba iadei bad ka kolshor kiba dang ïaid shakhmat. La khot sngewbha ia baroh ki skul ha ka thain, ki nonghikai, bad ki khynnah skul ban iashim bynta shitrhem.
