Shillong, Naitung 05: Ka jingialang jong ka Synjuk Ki Rangbah Kur Ka Bri U Hynñiewtrep la pynlong mynta ka sngi, 4 Naitung 2026, ha Mawkyrwat ban pynshai bad ia tai ia ki artylli ki mat ki ba ktah tyngeeh ia ki paidbynriew Khasi, kata ha ka ba pynneh ia ki riti dustur tynrai halor ka ba kheiñkur kheiñkha sha ka kmie, bad ki kynrum kynram na ka ba thmu ban taijlih ia ka KHAD (Regulation and Administration of Land) (Amendment) Bill, 2026.
Hadien ba la ia tai bniah da ki rangbah ka kynhun ka la kdew ia ka jingsngewkhia halor ki kyndon ki ba thmu ban sloit ia ka iktiar jong ki Dorbar Shnong, Dorbar Raij, and Dorbar Hima. La pynkynmaw ruh ba kita ki shlem synshar katkum ki riti dustur tynrai ki dei ki lad iada ia ki riti dustur katkum ba la shon shab ha ka Khyrnit Bahynriew jong ka Riti Synshar Ka Ri India.
Ki rangbahkur bad rangbahshnong ki la bynñiaw ia ka jingleh laplah jong ka Dorbar Thawaiñ Dalariti Rilum Khasi (KHADC) ha ka ba mushlia ia ki aiñ tynrai jong ka khlem da pynshongnia katkum ki nongrim jong ka synshar paidbah bashisha.
Ka jingialang ka la kubur ia ka jingpyrshang ban adkar ha ka rukom khaii khyndew hapoh u pud ba la buhti katkum ka aiñ bad ka ba pynsuk ia ka rukom korbar ia ka khyndew da ki buit treikam ka juk ka ba pynryntih bad pynbsuk ia ki paidbah, hynrei la kynthoh jur pat ia ka ba len ia ka synñiang bakhraw jong ki Dorbar Shnong, Dorbar Raij bad Dorbar Hima ha ka ba korbar ia ka khyndew hapoh upud u sam jong ka Dorbar ThawaiñDalariti.
Ki rangbah ki ba la kren halor kane ka phang ki la kdew ba kano kano ka jingpyrshang abn kylla ia ka aiñ da ka ba taijlih ka dei ban long ha ka nongrim jong ka Khyrnit Bahynriew khang ban ym jyrwit jyrwat ka synshar paidbah katkum ki riti tynrai ba naduh hyndai hynthai ka ba la neh pateng la pateng bad ba ka long ka ba biang na ka bynta ki paidbah.
Kiba la shimbynta ha ka jingkren pynshai shaphang ka aiñ bad ki riti dustur tynrai ki long u Bah Robert June Kharjahrin, Nongsaidaiñ, Bah Manstudy Nongrem, Khliehduh barim jong ka Dorbar Thawaiñ Dalariti (CEM, KHADC), Bah R. L. Kharpran, Khlieh Rangbah ka Synjuk Ki Rangbah Kur Ka Bri U Hynñiewtrep, bad Bah R. L. Blah, Saiñpyniar ka Synjuk Ki Nongsynshar Shnong.
Hadien ba la iakren sani da baroh ki rangbah bad ba la shim bynta da ki rangbahkur bad ki khlieh synshar shnong la rai ban kyrshan ia ka jingpyrshang ban lam lynti da ki artylli ki kynhun, ka Synjuk Ki Rangbah Kur Ka Bri U Hynñiewtrep bad ka Synjuk Ki Nongsynshar Shnong.
Khnang ban nang tur shaphrang ha ka jingiakhun ban pynneh ia ki riti dustur tynrai, la pynkhreh da ka jingialang jong ki rangbahkur bad ki khlieh nongsynshar shnong ha ka 7tarik Naitung 2026 ha nongbah Shillong.
Ka jingthmu ba kongsan ka long thik ha ka ba pynneh ia ka riti dustur kheiñkur kheiñkha na ka kmie bad ka ba pynneh ia ka iktiar jong ki Dorbar Shnong, Dorbar Raij bad Dorbar Hima ki ba hap hapoh ka jingkhmih jong ka Dorbar Thawaiñ Dalariti, khnang ba kito ki ba bat ia ka iktiar aiñ kin ym khynra bad mushlia ia kaei ka ba la seng da ki longshwa manshwa bad ka ba la pynskhem da ki aiñ ba pura ha ka shlem ka ba la kyrshan pynskhem da ka riti synshar ha ka Ri India.
