Shillong, Naitung 14: U General Secretary ka Khasi Student Union u samla Reuben A. Najjar la ong ba kaei kaba ka seng ka ioh lyngba ka RTI bad kaei kaba u mytnri rangbah ka jylla u kren kam ia hap ha kaba ia dei bad ka jaka talasi ia ki mynder ba rung sha kane ka jylla.
Haba kren ha ki lat pathai khubor mynta ka sngi ha ophis treikam ka seng ha Jaiaw, la ong ba ka jaka ha Umling la shna da ka jingthmu ban buh ia ka jaka talasi ia ki briew kiba rung ha kane ka jylla katkum ka ain MRSSA 2016 , hynrei wan noh ka khlam COVID-19 la pyndon kam ia ka ban peit ia ka jingpang COVID.
Kaei kaba ka seng kala shem ba mynta ka sorkar kala pynkylla ia katei ka jaka sha kata ka jaka ban die ja, ia kaba ka seng da lei lei kan nym ailad ban don kita ki jaka bam ha katei ka jaka.
Ka seng ka Dawa ban pyntrei kam ia ka Inner Line Permitm hynrei haba ym pat ioh wat la kitip ba ka MRSSA ka dang tlot hap ban pdiang ia ka ban peit ia kiba rung ba mih ia ki briew ba na bar sha ka jylla, hynrei kaba sngewsih ka long ba haduh mynta ym pat pyntrei kam pura ia kane ka ain ha baroh ki District, laitnoh ha East Khasi Hills kum ka jingpyrshang.
Na ka liang jong ka seng ka dawa ba ka sorkar ka dei ban pyntrei kam pura ia kane ka ain katba ym pat ioh ia ka jingmynjur na ka President ha ba ia dei bad ka jingpynkylla ia ka MRSSA ha u snem 2019, ka seng kam sngewthuh balei ka sorkar kam don jingkit khlieh namar ka jingwan ki briew na bar sha ka jylla ka dang jur katba dang mih ki sngi.
