Shillong, Naitung 14: Ka Khasi Students’ Union (KSU) Shillong Mihngi Circle, hapoh ka jingïalam u Assistant Organising Secretary ka Central Executive Council (CEC), u Samla Jeremiah Pohthmi, mynta ka sngi ka lah leit ban ïakynduh ïa u Deputy Inspector General ka CBI halor ka jingshna beaiñ ïa ka mandir ha phyllaw ka ophis sorkar.
Haba ïakren bad utei u ophisar ka CBI, ka lah mih ka jingïania bad ka jingïatai kaba jur hapdeng ki dkhot ka seng bad ki bor pyniaid ophis. Ha kane ka jingïakren kam shym lah ban poi shaei shaei, bad na ka liang ki dkhot ka KSU ki lah pynpaw ïa ka jingsngew bitar da kaba khang tala shi syndon ïa ka mandir.
U Assistant Organising Secretary ka KSU CEC, u Samla Jeremiah u la ong ba tang ha kine ki snem ba lah dep na ka liang ka KSU Shillong Mihngi Circle ka la leit ïa kynduh ïa ki heh ophisar ka ophis jong ka CBI ban pynsngew halor ka jingtei beaiñ ïa ka Madir phyllaw katei ka ophis Sorkar.
Na ka liang ki heh ophisar katei ka ophis ha kito ki por hadien ba ki lah ïoh ban ïa kren bad ki Nongïalam, ki lah ai ka jingpynthikna ba kan nym don shuh ka jingtei ïa ka mandir Hapoh katei ka Ophis, hynrei tang ha kine ki khyndiat sngi, ka seng ka la ioh jingtip ba katei ka Madir kala sdang biang ka jingpyntrei ban tei ïa ka.
Na ka liang ka seng hadien ba ka la ïoh jingtip ïa kane ka leit jurip bad ïohi ba ka jingtei ïa kane mandir ha phyllaw katei ka ophis ka lah jan dep. Hadien kane ka seng ka la khang tala shi syndon ïa kane ka Mandir.
Ka seng kala ai por shi taiew ïa ki bor ba dei peit ban pynpra ne pynduh noh syndon ïa kane ka mandir ha phyllaw ka ophis sorkar. Ka seng ka ong ruh ba lada kim leh eiei hapoh kane ka por ba la buh, ka seng kan sa shim da kiwei pat ki sienjam ba kham eh halor kane ka mat.
