Shillong, Naitung 14: U Chief Electoral Officer, Meghalaya, Dr. B.D.R. Tiwari, mynta ka sngi u la kyrpad ia baroh ki nongthep vote kiba dei hok ha kylleng ka Jylla ba kin iashim bynta shitrhem ha ka Special Intensive Revision (SIR), 2026 bad pynthikna ba uwei pa uwei u nongshong shnong uba dei hok un ioh rung ha ka Electoral Roll.
U la kyntu ïa ki nongthep vote ki bym pat pyndep ïa kane ka kam ba kin ïatreilang bad ki Booth Level Officer (BLO) ha ka por ba ki wan sha man la ki ïing lane ban shim ïa ka lad online ban pyndap, ban soi lyngba ka lad digital bad pynpoi ia ki Enumeration Form jong ki.
U Dr. Tiwari u la buh ia kane ka jingkyrpad ha ka jingialang bad ki lad pathai khubor halor ka jingïaid shaphrang ka Special Intensive Revision (SIR), 2026 ha Shillong mynta ka sngi.
U Chief Electoral Officer u la pyntip ba ka Special Intensive Revision ka la iaid shakhmat ha kylleng ka jylla Meghalaya lyngba ki jingtreilang jong ka kam elekshon bad ka jingiatreilang jong ki nongthep vote.
Haduh ka 14 tarik Naitung 2026 (09:58:12 Mynstep), na ki 23,49,645 ngut ki nongthep vote, la dep sam haduh 19,91,883 tylli ki Enumeration Form (EF), kaba la pyndep 84.77 percent. Nalor kata, ladep ban pynkylla Digital haduh 5,64,610 tylli ki Enumeration Form kaba long 24.03 per cent na baroh ki nongthep vote.
Napdeng ki District, ka West Jaiñtia Hills kadei kaba bun tam ka jingsam ia ka Enumeration Form kaba long 98.94 percent, bud sa ka South West Garo Hills (97.77%), North Garo Hills (95.12%), South West Khasi Hills (90.37%), bad East Garo Hills (88.84%).
Ha kaba ïadei bad ka jingpynkylla digital ïa ki Enumeration Form, ka East Jaiñtia Hills ka la lamkhmat ïa ka Jylla da kaba ïoh 41.55 percent, bud sa ka South West Khasi Hills (40.31%), Eastern West Khasi Hills (36.73%), South West Garo Hills (34.01%), bad West Garo Hills (33.23%).
Haba ban jur ïa ki sienjam ba la shim ban pynkhlaiñ ïa ka jingïashim bynta jong ki paidbah ha ka kam ban pynthymmai, u Dr. Tiwari u la pyntip ba la pynlong ïa ka Awareness and Interaction Programme halor ka Special Intensive Revision bad ki Dkhot ba donburom jong ka Ïing Dorbar Thawaiñ ka Jylla Meghalaya ha ka hybrid mode ha ka 13 tarik Naitung, ha Conference Hall, MLA Hostel, Shillong.
Ha ka jingiakren, la batai ia ki jingthmu, ka jingmut, ki por bad ki rukom treikam jong ka kam pynthymmai, bad la pan jingkyrshan na ki nongthaw ain ha kaba wanrah ka jingsngewthuh hapdeng ki nongthep vote bad ban pynshlur ia ki nongshong shnong ban iashim bynta shitrhem ha kane ka kam.
U Chief Electoral Officer u la pyntip shuh shuh ba ka ophis jong u ka la pynlong ïa ki jingïalang peit bniah man ka taiew lyngba ka video conferencing bad ki District Election Officer (DEO), ki Electoral Registration Officer (ERO) bad ki Assistant Electoral Registration Officer (AERO) ban buddien bha ïa ka jingïaid shaphrang jong ka jingsam sha man la ki iing bad ka jingpynkylla digital ia ki Enumeration Form, nalor ka jingpeit bniah ia kiwei kiwei ki kam hapoh ka prokram SIR.
La bthah ia ki ophisar ba kin peitngor bha ïa ka jingtreikam jong ki Booth Level Officer, ban pynbeit kloi ïa ki jingeh ha ka jaka treikam bad ban pynthikna ba baroh ki kam kin pyndep hapoh ki por ba la buh da ka Election Commission of India.
Ha ka jingiakren bad ki lad pathai khubor, ki dkhot jong ki lad pathai khubor ki la kyrpad ba dei ban pynlong ia ka facilitation camp kaba kyrpang khnang ba ki nongthoh khubor kin lah ban pyndep ia ki kam ba iadei bad ka Special Intensive Revision.
Haba jubab ia kane, u Dr. Tiwari u la pyntip ba ka Ophis jong u Chief Electoral Officer kan sa pynlong shen ïa ka facilitation camp ba kyrpang na ka bynta ki nongthoh khubor ban ïarap ïa ki ban pyndep bad aiti ïa ki Enumeration Form jong ki.
Haba ai khublei ïa ki sienjam jong ki nongtrei ha ka kam elekshon, u Dr. Tiwari u la ïaroh ïa ka jingaiti lut jong ki District Election Officer, Electoral Registration Officer, Assistant Electoral Registration Officer, Booth Level Officer, BLO Supervisor bad baroh ki ophisar ba dei peit ia ka kam elekshon na ka bynta ka jingaiti jong ki sha ka jingpyntreikam kaba jop ïa ka Special Intensive Revision ha kylleng ka jylla.
Haba ban biang ïa ka jingkyrpad jong u, u Chief Electoral Officer u la kyntu ïa ki nongthep vote ki bym pat ïoh ne pynpoi ïa ki Enumeration Form ba kin pyndep kloi ïa kane ka kam, la ka long lyngba ki Booth Level Officer jong ki lane da kaba pyndonkam ia ka lad online. U la ban jur ba ka Electoral Roll kaba thikna, kaba kynthup lang ia baroh bad kaba la pynthymmai ka long kaba kongsan ban pynkhlain ia ka synshar paidbah bad ban pynthikna ia ka elekshon kaba laitluid, kaba ryntih bad kaba iashim bynta lang.
*****
