Jowai, Rymphang 10: aw ha ki kam pyndonkam bakla ia ka pisa paidbah na ka por sha ka por, kyndiat taiew shwa ka Election MDC ha u snem 2009, ka la paw ba la pyndonkam bakla ia ka pisa paidbah kaba haduh 75 lakh tyngka. Shwa ia kane, ka la don ruh ka jingpyndonkam bakla ia ka pisa paidbah kaba la kot haduh 4.79 klur.
Ha kane ka kynti kaba mynta pat ka jingpyndonkam bakla ia ka pisa paidbah ka la paw pyrthei biang ha kaba la kynnoh ba u Khliehduh ka JHADC, u ma MB Rymbai, CEM u la sei ia ka pisa kaba la kot haduh 43.50 lak ha ka kyrteng jong uwei u rangbah na ka shnong Sohmynting, u ma Coming Pyrtuh bad la kynnoh ba la soi thok ia ka kyrteng jong u. Ia kane la lap lyngba ka jingwad jingtip lyngba ka RTI (Right to Information) Act, 2005 da kawei ka longkmie ka kong Arlin Dkhar kaba na ka shnong Khliehtryshi.
Katkum katei ka RTI Report ka paw ba u Ma Madonbai Rymbai uba dei ruh u MDC ka thain Khliehtyrshi-Sohmynting u la pyllait ia ia skim kaba la kot haduh T. 1, 18, 50, 000/-. na ka skim Discretionary Grant (DG) T. 66 lakh bad Gratuity Relief T. 52, 50,000/-
Na katei ka skim la sei 43.50 lakh ha ka kyrteng jong u ma Coming Pyrtuh da kaba soi thok iaka kyrteng.
U ma Coming haba iakren bad ki katto katne ki Nongthoh khubor kiba leit hiar ban tohkit ban lap ia ki jingshisha, u la pynpaw ia ka jinglyngngoh kaba khraw ban iohi ia ka kyrteng jong u bad ia ka dor jong katei ka pisa kaba heh.
“Nga kren khuid ba ngam shym la ioh satia ia katei ka pisa bad ngam ju ioh satia ia kano kano ka skim iarap na utei u MDC lane na ka Ophis JHADC”, u la iathuh. Katkum ka RTI Report, ia kane ka pisa la ioh pdiang da u ma Coming Pyrtuh ha ka 02-12-2013
U ma Modanbai Rymbai u la pyndonkam ia la ka bor jong u kum u Chief Executive u la sam ia kham bun ka pisa grant sha kiba haiing hasem jong u kaba la kot haduh T. 11,20, 000/- kynthup ia u Hynmen jong u, u Sanbok Rymbai T. 6, 50, 000/- , ka kmie jong u ka Tein Rymbai T. 1, 70, 000/- ki Para kynthup ia Lasan Rymbai T. 1 lakh, Kitbok Rymbai bad Mar-o Rymbai mar T. 50, 000/- ka kurim jong u, ka Lewanka Dkhar 1 lakh.
U la sam ruh sha ki ar ngut ki leader jong u kiba kynthup ia u Bnai Rymbai uba la ioh T. 5, 00, 000/- bad u Karwing Muruh u la ioh T. 6, 00, 000/- ka kmie u Bnai Rymbai kaba la tymmen ka Sngi Rymbai, ka la ioh 2 lakh 50 hajar tyngka.
Shuh shuh bun ngut ki nongioh jingmyntoi (Beneficiary) kiba la paw kyrteng ha ka RTI report ki la iathuh ba kim shym la ioh satia ia ka pisa kumba la paw ha katei ka report.
U Rangbah Shnong barim ka Mupyut u ma Mol Dkhar u la iathuh ba um ju ioh skim satia na ka JHADC. u Ma Dre Dkhar uba dei ruh u rangbah Shnong barim ka shnong Mupyut u la iathuh ba ma u ruh um shym la ioh satia ia ka pisa kumba la paw ha ka RTI Report.
Katkum ka RTI Report u ma Dre Dkhar u la sei ia ka Pisa kaba T. 1,57, 500/- ha ka 02-12-2013, uwei pat u rangbah na shong Sohmynting u ma Tyngshain Pyrtuh ruh u la iathuh ba ma u ruh um shym la ioh satia ia katei ka pisa kumba paw ha ka RTI report.
U Ksoh Pakyntien na Demthring, Lambor Blah na Demthring, Hom Chyrmang na Mupyut, Phel Kyndait na Thangbuli, ka Chiality Kyndait, u Sailin Pyrtuh kiba na Sohmynting, u Phel Kyndait na Thangbuli bad u Tbn. Tiarsing Nongrum na Phlongingkhaw, u ma Bro Surong na Thangbuli ki la pynpaw ba kim shym la ioh ia katei ka pisa kumba la paw ha ka RTI report. Kane ka jingleh u CEM uba dei ruh u MDC ka thain ka la pynbitar ia kiba bun kiba la paw kyrteng ha katei ka RTI.
Nalor kitei ki bym la paw kyrteng khlem ioh jingmyntoi, ki don ruh bun ngut ki kyrteng snaiap ne kyrteng shu-thaw kiba kynthup ia u Bran Pohsiej, Choin Kyndiap bad u Sain Pohsiej kiba dei na shnong Mupyut. Ia kane la pyntikna da u Mol Dkhar bad u ma Dre kiba la iathuh ba ym don briew satia kiba kyrteng kum kitei ki briew hapoh ka shnong jong ki.
Bun ruh ki riew paidbah kiba la ioh kopi ia kane ka RTI ki la kynthoh pyrshah ia kane ka jingleh jong u CEM ka JHADC. Kane ka skim kadei ban sam sha baroh ki paidbah jong ki 29 tylli ki Constituency, hynrei la sam ia ka tang ha Khliehtyrshi, Sohmynting, Demthring bad ha ki katto katne ki shnong kiba hap hapoh ka Constituency jong u ma Modanbai Rymbai.(SP News)
