Shillong, Naitung 30: Ka Mawlai Sports Club ka la lah ba kan pynliem ia ka Laitkor SC da 5-0 ha ka jingiakhun kaba khatduh jong ka kylla ba nyngkong (First Round) ka lympung ialehkai Shillong Premier Lague 2026, ka Shillong Sports Association, ba la long hynne ka nohphai sngi ha SSA Stadium, Polo.
Kane kan dei kawei na ki nam jop ne ka namrem kaba heh tam ha kaba sdang jong kane ka lympung mynta ka samoi, kaba ia kine ki 5 tylli ki kol ka Mawlai SC, la thep ia ki lyngba u Samlang Rympei (49’), Fairming Suting (52’), Wadshwa Latoo (55’), Basuklang Bina (71’) bad Bajiedlang Rangslang (86’).
Ka khana jong kane ka jingiakhun ka long ba ka kylla step ka la kut shwa ha ka jingiakhaid ka bym shim la don satia mano mano ba lah ban ioh pynkhih ia ka jar, kaba pynpaw ia ka jingiabiang bor bha hapdeng kine ki ar kynhun.
Pynban dei tad haba la wan ban bteng ia ka kylla miet, ba ki rang ialehkai jong ka Mawlai kiba la ioh shuh shuh ia ka jingbatai kaba bniah bha na la u coach u bah Hering Shangpliang, ki la sdang ban kylla ka rukom ialehkai ka jong ki, kaba na ka por sha ka por kila sdang wat ban da lah ban sam lyngba ia ka kut ialehkai ka Laitkor SC bad ruh ban tynjuh bor bah bha naduh kaba sdang.
Ha kum kane ka sur ialehkai, ba ki rang ialehkai ka Laitkor SC kiba la shah nion tyngeh ba kim lah ba kin shan slem shuh ialade kaba kiba bun na ki kol ba ki la shah thep ka dei kaba kim lah ban phai kylla shuh ialade hynrei satang ban shu shem bad iohi ia ka jingkhih kaba ir shi ir ka jar ka jong ki.
Hadien ba ka Mawlai ka la lah ba kan tam shakhmat da kumba ar kol, kaba itynnad ban iohi ia ki player ki jong ka pat ka long ba kim shim la khein sting ne ban kynran dien, pynban na ka por sha ka por ki iai bteng ban nion beit shakhmat ka rukom ialehkai ka jong ki, kaba hangne ka la nang bam shuh shuh ia ka buit ka bor ialehkai ki rang jong ka Laitkor SC, tad haduh ba kim lah shuh ba kin peiphang ba da kumno ba kin lah ban tem ia ka rukom ialehkai kaba tbit bad kaba pnah jong ki player ka Mawlai SC.
Wat la katta ruh ki la don pat ki khep ba ki ang ialehkai ka Laitkor ki la sdang ba kin sei madan ia ka mynsiem iakhun ka jong ki da ka jingpyrshang ban khyrwit jam bha ia ka bol sha ka kol ka Mawlai, ia kaba kine ki jingpyrshang lah pat ban ong ba kim shim la long kiba don jingma na kaban pynshitom ia u rang ap kol ka Mawlai SC u Lambhamiki Lamare.
Ka jingiakhun kaban wan jong kane ka lympung, kaban dei ruh ka jingsdang ia ka kylla kaba ar (Round 2) kan long biang pat ha ka 4 tarik u bnai Nailar u ban wan, ha kaba ka Sawmer SC kan iakhun pyrshah ia ka Rangdajied United FC, kaban long ha ka por 4 baje nohphai sngi.
Ka Sawmer SC kan rung sha kane ka jingiakhun hadien ba ka la shah liem da 1-0 hakhmat ka kynhun ialehkai ka Langsning FC, katba ka Rangdajied United FC kan rung sha kane ka jingiakhun hadien ba ka la lah shwa ba kan iakhaid da mar shi kol pyrshah ia ka MLP FT ha ka jingiakhun kaba dei ka wat ba nyngkong.
