New Delhi, Nailar 05: Ka Sorkar ka la pynkhlaiñ ïa ki aiñ bad ka rukom treikam ban ïakhun pyrshah ïa ki jingpyndonkam beain ia ki phlim lyngba ki lad online, kynthup ïa ka jingpynsaphriang khlem jingbit ïa ki phlim lyngba ki nongpynïaid kum ka Telegram.
La pynkylla ia ka Cinematograph Act, 1952 lyngba ka Cinematograph (Amendment) Act, 2023 ban wanrah ia ki kyndon ba kyrpang ban tehlakam ia ka jingring tuh bad pyni ia ki phlim khlem jingbit.
Ka Section 7(1B)(ii) ba la pynrung thymmai ka ai bor ïa ka Sorkar, hapoh ka Section 79(3) jong ka Information Technology Act, 2000, ban shimkhia pyrshah ïa ki nongpynïaid kiba pyni ia ki prokram ba la pyndonkam khlem da ioh jingbit na ki nongshna.
Ka Section 79(3)(b) jong ka IT Act, 2000 ka ailad ban bthah ka Sorkar ia ki nongpyniaid ban weng/pynsangeh ia ki prokram kiba be-aiñ. Hapoh ka Information Technology Rules, 2021, ki nongpynïaid ki dei ban weng noh ïa kino kino ki prokram kiba pynkheiñ ïa kano kano ka aiñ kaba dang treikam mynta katkum ka por ba la wanrah sha ka jingtip jong ki la ka long lyngba ka hukum jong ka ïingbishar lane lyngba ka jingpynbna da ka sorkar ne ka tnad jong ka ba la ai bor.
Hadien ba la ioh ia ki jingujor ha kaba iadei bad ka jingpyndonkam ia ki phlim khlem da ioh jingbit, ka Tnad ka la pynmih ia ki jingpynbna sha ki nongpyniaid da kaba bthah ia ki ban weng ne pynsangeh noh kloi ia ki prokram kiba ym lah ban pyndonkam katkum ka ain.
Ka sorkar ka la ai bor ia u Joint Secretary (Films), ka Tnad Information bad Broadcasting ban phah ia ki hukum sha ki nongpyniaid ban weng ia ki prokram hapoh ka Information Technology Rules, 2021 bad ka Cinematograph Act, 1952.
La sdang ruh ia ka rukom treikam ha ka Tnad Information bad Broadcasting ban pdiang ia ki jingujor na ki trai jong ka copyright ha kaba iadei bad ki kopi thok jong ki phlim kiba don ha ka internet bad ban pynmih ia ki jingpynbna sha ki nongpyniaid ban khanglad ia ka jingrung jong kum kine ki prokram.
Ka sienjam pyrshah ia ka jingpyndonkam khlem da ioh jingbit, Katkum ki kyndon jong ka aiñ ba la kdew haneng, la bthah ïa ki nongpynïaid ban pynduh noh ïa 7,393 tylli ki URL, ba kynthup 1,263 tylli ki website bad 4,996 tylli ki Telegram channel na ka bynta ka jingtuh ia ki phlim.
Ïa kane ka jingtip la ai da u Myntri Khynnah ba dei khmih ia ka Tnad Information and Broadcasting bad Parliamentary Affairs, u Dr. L. Murugan, ha ka jubab ba shu thoh ia ka Jingkylli ba la kylli da u Balashowry Vallabhaneni ha Lok Sabha mynta ka sngi.
