Shillong, Nailar 18: Ka President jong ka All Meghalaya Fair Price Shop Dealers ka kong Saralin Kharlukhi mynta ka sngi 18/Nailar/2026 kala pynbna ba ka jingialang bah kiba sam khaw ration ha jylla Meghalaya kan long ha ka 12/Nailur/2026 ha State Convention Centre Shillong.
Haba kren ha ki lat pathai khubor ha Shillong Press Club ha ka jingiadon lang ki dkhot katei ka seng ha Shillong Press Club la khot la wer ia baroh ki nongsam khaw ration ha ka jylla Meghalaya ba kin ia poi ha katei ka sngi ban ia kren ia ka khia ka shon kaba ki ia kynduh ha kane ka kam sam khaw ration.
La iathuh ba ha kane ka jingialang yn wan ban pynshai sha ki nongsam khaw ration da u General Secretary jong ka All India Fair Price Shop Federation, un wan ruh u President jong ka Northeast kine baroh arngut, kin pynshai ia ka jingeh kaba ki ia kynduh bad ha kajuh ka por kin batai ruh ia ki jingmyntoi kaba ka sorkar pdeng kala ai sha ki nong sam khaw ration.
Ki jingeh kiba ki nongsam khaw ration ki iakynduh ha kane ka jylla Meghalaya ka long halor ki jingkyllain ka rukom pyllait ia u khaw ration sha ki dukan Fair Price Shop namar haduh mynta kam pat don kata ka jingbthah kaba shai ha kaba iadei bad ka jingshah khate jong u khaw kane ka buh ha ka um dum.
Ka President kala pynsngew ruh ba ka jingai ia ka bai kit ia u khaw na ki ba die lang sha ki dukan Fair Price Shop kam long kaba ryntih hynrei kaei kaba ka sorkar pdeng ka buh ka long salonsar kajuh ia baroh kata ka long T.120/- ha ka shi kwintal.
Haba iadei bad ka jingleh eKYC, ka president kala ong ba haduh mynta kam long kaba shai hynrei kum ha Ri Bhoi District ba ia kito kiba khlem leh kala ong ba la pynduh ia u khaw dei halor kane la khot la wer ia baroh ki nongsam khaw ba kin ia poi ha kane ka jingialang bah banyngkong jong ki nongsam khaw ba sngewthuh ia ki jingeh kaba ki iakynduh.
