Shillong, Nailar 18: Naduh ka jingrep ia u saffron ha kylleng ka thain shatei lammihngi haduh ki jaka pynkhreh ia ki jingbam kiba poi sha ki nongrep ha ki jaka ba jngai, ka North East Centre for Technology Application and Reach (NECTAR) ka la pyni ia ki sienjam ba la pyniaid da ka teknoloji ha ka jingialang kaba manla u bnai jong ka Inter-Media Publicity Coordination Committee (MPCC) kaba la pynlong ha ophis treikam jong ka ha Shillong, mynta ka sngi.
La ai jingtip ïa ki nongïashim bynta shaphang ki sienjam jong ka NECTAR kiba thmu ban shim ïa ki lad ki lynti kiba katkum ka jingstad science bad ka teknoloji kham jan sha ki shnong ki thaw ha kylleng ka thaiñ Shatei Lammihngi. U Dr. Arun Kumar Sarma, Director General, NECTAR, u la kren shaphang ka jingtreikam jong ka Centre halor ka jingrep ia u saffron ha ki bynta bapher bapher jong ka thain, kynthup ia ka Sikkim, Arunachal Pradesh, Meghalaya bad Mizoram, kaba pyni ia ka lad jong ki jingiarap katkum ki jingstad saian ban pyniar ia ki lad ba iadei bad ka rep ka riang.
Ka Centre ka la pyni ruh ia ka Mobile Food Processing Unit jong ka, kaba la shna ban rah ia ki lad pynkhreh bad ki lad kyntiew kam kham jan sha ki nongrep ha ki jaka ba jngai. Ka jaka ka kyrshan ia ka jingpynkhreh ia ki mar rep naduh ka jingpynbiang ia ki mar haduh ka jingkyntiew ia ka kam, ka jingthep ha ki bilor bad ka jingsong, kynthup ia ki jingpynbeit tetra-pack, kaba iarap ban kyntiew ia ka jingpyniaid hadien ba la dep ot bad ka jingpynioh ia ka dor na ka bynta ki nongrep.
Hadien ka jingïalang, ki nongïashim bynta ki la leit jngoh ïa ki jaka treikam ba kongsan jong ka NECTAR, kynthup ïa ka Vasundhara Soil Lab, STEM Lab, GIS Lab bad Mobile Processing Unit. Ki ophisar jong ka NECTAR ki la ai jingtip ia ki nongiashim bynta shaphang ka jingtreikam bad jingpyndonkam ia kine ki jaka, da kaba ai ia ka jingbatai markhmat kumno la pyndonkam ia ki lad ki lynti katkum ka jingstad saian, ka teknoloji bad ki lad geospatial ban weng ia ki jingeh ha ka thain bad ban kyrshan ia ki briew ha kylleng ka thain shatei lammihngi.
Ïa kane ka jingïalang la pynlong da ka Press Information Bureau (PIB), Shillong, Tnad Information and Broadcasting kum shi bynta ka sienjam jong ka IMPCC ha ka thaiñ kaba thmu ban pynkhlaiñ ïa ka jingai jingtip, ka jingïatreilang bad ka jingïasam jingtip hapdeng ki tnad Sorkar, ki kynhun bad ki lad pathai khubor.
Ki nongmihkhmat na ka IIM Shillong, ICAR-Umiam, NEEPCO, tnad Census, MY Bharat, IMD Shillong, PIB & CBC Shillong, Tnad Soil & Water Conservation, Akashvani Programme Section, Akashvani North Eastern Service (NES), NEIAH bad kiwei kiwei ki kynhun kiba iashim bynta ki la wan ban iashim bynta ha kane ka jingialang bad ki la iasam ia ki jingtip shaphang ki prokram jong ki kiba dang iaid shakhmat. ki jingjop bad ki kam ki ban sa wan.
Ki nongiashim bynta ki la ban jur ia ka jingdonkam ban don ka jingiatreilang kaba kham bha hapdeng ki tnad bad ka jingiatreilang bad ki lad pathai khubor ban pynthikna ia ka jingpynsaphriang jingtip kaba kham iar shaphang ki sienjam jong ka Sorkar bad ki prokram kiba iadei bad ka bha ka miat jong ki paidbah. Ki jingiakren ki long halor ka jingsam jingtip, ka jingpynbna paidbah ba iasoh lang bad ka jingwad ia ki lad ki lynti na ka bynta ki kam ba iatreilang ha ki kam pathai khubor, ka jingleit jngoh ia ki jaka treikam bad ka jingiasam ia ki khana jingjop lyngba ki rynsan pathai khubor bapher bapher.
La pyni ia ka IMPCC kum ka rynsan kaba treikam bha ban pynkhlain ia ka jingiatreilang hapdeng ki kynhun jong ka Sorkar bad ban pynsuk ia ka jingai jingtip kaba kham kloi, kaba thikna bad kaba pynshong nongrim ha ki briew ha kylleng ka thain shatei lammihngi.
Ha kane ka jingialang, la rai ruh ba baroh ki tnad bad ki kynhun kiba iashim bynta kin rakhe ia ka Hindi Diwas bad ka Hindi Fortnight ha u bnai Nailur 2026 ha ka rukom kaba dei, ryngkat bad ki prokram bad ki kam kiba biang ban pynshlur ia ka jingiashim bynta kaba kham heh bad ban kyntiew ia ka jingpyndonkam ia ka ktien Hindi ha ka jingai jingtip ka Sorkar.
Ka jingleit jngoh bad jingïakren ha ka NECTAR ka la iarap ïa ki jingthmu jong ka IMPCC da kaba ai ïa ki nongmihkhmat jong ka Sorkar bad ki lad pathai khubor ïa ka jingsngewthuh shaphang ki jingïarap ba la pyniaid da ka teknoloji ha ka thaiñ bad pynsuk ïa ka jingpynsaphriang jong ki kaba kham jylliew bad kaba kham bniah lyngba ki lad pathai khubor bapher bapher.
