Shillong, Nailar 18: Ka Meghalaya Bharat Scouts and Guides kala pynlong iaka 23rd State Council Meeting, ba dei ka jingialang ba hakhlieh tam jong ka jylla ha P.J. Bazeley Hall, State Headquarters, Shillong mynta ka sngi.
Katba ki nongialam ha kane ka jingialang, la pyniaid da u V.K. Mantri, IAS ka Commissioner bad Secretary ka tnat shlem jingstad bad u State Chief Commissioner jong ka Meghalaya Bharat Scouts and Guides, namar ka jingbym don ryngkat u Dr. Shakil P. Ahammed, IAS, Chief Secretary ka Sorkar Meghalaya bad u President ka Meghalaya Bharat Scouts and Guides.
Ka jingkynmaw burom ha kane ka jingialang kala sdang da ka jingkynmaw ieid bad ka jingsngap jar baroh shi khyllipmat ban pynkup burom iaka kong R. V. Suchiang, bam kwai ha dwar u Blei, IAS, kaba la long ka Chief Secretary barim bad ka President barim jong ka State Association.
Ki mat ba la iatai ki long halor ki rai kiba donkam bha ban kyntiew iaki thong jong ka synjuk, khamtam halor ka jingpynbiang bor bad ka jingkyntiew iaki kam khynnah samla ha ka jylla. Ha kane ka jingialang, u State Chief Commissioner u la pynlait paidbah iaka Annual Report na ka bynta u snem 2025 – 26 bad u la pynpaw iaka jingiaroh bakhraw iaka jingtreihok jong ki dkhot ka council. Katba iaka kyntien wai jong u, u la ai khublei iaki dkhot baroh bad u la pynrem iaka jingdonkam ban kyntiew iaka jingniew briew bad ka jingpyniasoh dkhot hapoh ka jylla.
U la khot la wer ban don ka jingtrei shitom kaba iai bteng na baroh ki liang ban pynskhem iaki jingtrei naduh tynrai. Ka jingialang kala pynkloi da ka jingrwai Ri (National Anthem), kaba pynkynmaw iaka jingtylli bad ka jingiasnoh lang ban kyntiew ia kane ka synjuk kaba iaid shakhmat.
