Shillong, Nailar 21: Ki bor jong ka District Administration jong ka East Khasi Hills District wat la kila pyndam noh ia ka jingbit kaba la ai sha ka Khasi Student Union ba kin shong ia khih kyllain mungor ha Khyndailad, ban pyntikna ba kan nym don kano kano ka jingthut ia ka leit ka wan la pynkhlain ia ki bor pahara ha kaba la pynap ia ki kynhun pulit Rapid Action Force.
Ka jingpahara nalor ki kynhun pulit RAF la buh ruh ia ki pulit jong ka distrik bad kumjuh ia ki pulit Special Force -10 kane ka long ban pyntikna ba kan ym don kano kano ka jingpynwit ia ki paidbah ha ka leit ka wan ha katei ka thain bad ha kajuh ka por ban pyntikna ba kan nym don kano kano ka jingialum paidbah kumba la pynjari ia ka kyndon 163 BNSS.
Ki pulit kila pynlong ia ka jingkhynra ia ki kali ar shaka ha Lad Umsohsun ban rung sha Police Bazar bad na shatei shaneng kila khynra ia ki kali ar shaka ha khmat ka ophis Deputy Commissioner Ka East Khasi Hills District, ha kane ka jingkhynra ki pulit kila phah loit ia kiba niah ar shaka kiba kah ia ka dur khmat ka jong ki kaba ki sop da ki kynja jain.
Ha kane ka sngi ki kmie ki kpa kiba phah skul ia ki khun bad kumjuh ki samla pule kiba leit sha ki kollej bapher bapher ki don ka jingsngew syier ia la ki jong ki khun wat la kam shym don kano kano ka jingjia ka ban jia hajan ki jaka ba don ki jaka pule ki bor jong ka District Administration kila pynkhlain ia ka jingpahara ban pyntikna ba kan don ka jingshngain bad ba ki riew sniew kin nym iohlad ban leh ia ki kam runar.
