Shillong, 22 Nailar 2026: Ka Meghalaya Pradesh Congress Committee (MPCC) kala pynrem jur ia baroh ki jingjia iakynad, jingpyn tieng bad jingpyn thut iaki paidbah ka nongbah Shillong, Meghalaya kaba lam sha ka jingsheptieng, jingshitom bad jingjynjar.
Ha kajuh ka por, ka seng MPCC kala pynrem jur iaka seng NPP bad BJP ba la ialam da ka sorkar jylla ban ai teh lakam iaki jingjia iakynad, ban ai jingiada iaki paidbah, pynneh iaka ain bad ka rynsan longbriew manbriew bad ban khanglad ia kino kino ki jingjia lane ki jingkulmar, kiba kynthup iaka khappud Meghalaya bad Assam.
Ki paidbah ka jylla Meghalaya kila ngat ha ka jingshitom bad jingjynjar tang na ka daw ka jingsynshar kaba leh mynleh, kaba da thala bad khlemakor bad kaba pynngiah shisha. Wat la ki don ka jingtip lypa, ka rukom treikam synshar bad ka jingmaham kaba biang halor ki jingkulmar kiba sdang ban mih, pynban ka sorkar kam shym la lah ban leh eiei da ka jingkitkhlieh, ka jingsngewthuh bad ka jingkhreh kaba biang kumba ka rukom ka dawa.
Katba dang don kine ki jingkulmar, hynrei la hap ioh bainong ki paidbah ka jylla Meghalaya kiba leit ba wan kiba ym don shuh ka jingshngian ban leit jingleit. Ki nongleit jngoh kai pyrthei kila hap pyn sangeh noh iaka jingkwah leitkai jong ki, ha kaba kane kala pynlong iaka jingduh nong ba bun iaki jaka sah kum ki hotel, homestay, ki nongpyniaid iaki kali kamai, ki jaka bam, dukan bad ki katto katne ki hajar ngut ki longiing baa ap khmih lynti na ka kam jngoh kai pyrthei.
La ong ruh ba ki nongpang bad ha ki jaka sumar kila shem jingeh tang na ka daw jong kane ka jingiakhih kaba la pynthut ha ka liang ka jingioh iaki dawai dashin ha ka por ba biang bad kiwei kiwei ki jingdonkam. Ki samla pule, nongtrei, nongkhaii bad ki nongleit nongwan kila ngat ha ka jingeh tang na ka daw jong kiwei.
Ka Meghalaya kam lah ban pynmih iaka dur ba ka long ka jaka kaba ym shngain bad kaba bha bad ka shim por da ki snem ban tei iaka jingshaniah jong ki nongleitkai bad ki nongbei tyngka, hynrei tang khyndiat ki jingjia bad ka jingbymbiang ka sorkar ka lah ban pynjot ia kata ka jingshaniah.
Ka MPCC ka khuslai halor ka rukom pyniaid iaka kam khappud bad ka Assam. Kane ka kam ka dawa iaka jinglong banylla, ka jingiakren ba nyngkong bad ka jingpynbeit ba paka ha ka por kaba biang. Kim dei ban ailad ia kane ka kam ban thnam namar ka jingkhein sting ka sorkar ne ki bor synshar.
Ka sorkar kala pyrshang ban burieh iaki jingrem jong ka da ki jingpynbna bad ki kular thala. Ka jingshah kynnoh bamsap, ka jingbymdon ka jingshai bad ki jingkular kila pynjahiaka jingshaniah u paidbah. Haba ka sorkar ka leh eiei tang ynda lah jia ka jingjia, hynrei dei ki paidbah kiba shah pynthut.
Ka Congress ka pynrem iaka jinglehbor bad ka jingshah pynmynsaw ki nongshong shnong kiba lui lui. Ym don kano kano ka jingdawa politik kaba lah ban pynksan iaka jingpynjot pynpra iaki mar ki mata.
Ka kam ban iada ia u khun u hajar ka dei ka kamram ba kongsan jong ka sorkar, Ka sorkar ka dei ban pynbiang kloi iaka jingshngain bad ka leit ka wan kaba khlem don jingthut jong ki jingshitom bad ki mar ba donkam.
Ka dei ban iakren bad baroh ki kynhun ban pynbeit iaka kam khappud. Ka Meghalaya ka donkam iaka synshar khadar kaba shisha, ka jinglah ban pyndep kam, ka jingshai, bad ka jingialam kaba iada ia la u paidbah.
