Shillong, Nailur 02: U Deputy Commissioner jong ka East Khasi Hills District u Abhilash Baranwal u la ong ba tang ha ki phra bnai ka jingshah dait ksew ha East Khasi Hills District ka la kot sha ka 7500 ngut.
Haba plie paidbah ia ka jingpynkhreh ban ia ialeh pyrshah ia ka jingshah dait ksew la sdang ia kane ka jingialeh pyrshah na Laban ia kaba la tip kum ka “Action Plan for the Elimination of Dog-Mediated Rabies”
Ka jingthmu ka long ban pynkhlain ia ki lad ai jingiada na ka jingshah dait ksew, ban shim jingkhein ia ka jingdon ki ksew bad ban ai tika ia ki bad ban ai injek ba kin nym kha khun shuh ki ksew surok bad na ka liang jong ki trai ba ri ksew ruh kin don ia ka jingkit khlieh bad ba kin da ai bam.
U Deputy Commissioner u la ban jur ban don ka jingiatreilang bad ki bor shnong bad ki paidbah nongshong shnong namar la buh ia ka thong ban pynduh ia ka bih ksew ha u snem 2030 kum ka jingsdang ban iada na ka bih ksew la sdang ia kane ka kam na Laban.
Ha ka jingkren u Additional Deputy Commissioner u bah F.B Basab u la ban jur ia ka jingdonkam ban ia treilang bad ki bor jong ka District Administration, ki bor shnong, ki paidbah nongshong shnong bad ki paidbah kiba shong ba sah ha ki shnong bad ki dong. Lada ki ksew ki dait ne pynmynsaw briew yn ujor da ka ejahar pyrshah ia kiba ri ksew.
Kan don ka jingiatreilang ka tnad ka koit ka khiah, ka tnad Pulit, khamtam ki trai kiba ri ksew kin hap ban shim ia ka jingkit khlieh ba ki ksew kiba ki ri kin nym pynthud ia ka leit ka wan ki nongshong shnong bad kiba wan ha ki shnong ki thaw kumjuh ia kiba iaid lynti, ki trai ksew baroh ki hap ban register bad ki rangbah shnong ki hap buh jingkhein ia ki ksew ba la ai tika.
