Shillong, Nailur 10: Ki nongthoh khubor na Meghalaya bad Sikkim ki la leit jngoh ïa ka Cochin Shipyard Limited (CSL), ka jaka shna lieng jong ka Sorkar kaba heh tam ha India kaba don ha Kochi mynta ka sngi kum shi bynta ka Press Tour sha Kerala ba la pynlong da ka Press Information Bureau (PIB).
Ha kane ka jingleit jngoh, ka kynhun ka la iohi ïa ki jaka ba pyndonkam na ka bynta ban shna lieng bad ban maramot ïa ki lieng bad la ai jingtip lyngkot shaphang ki kam jong ka CSL ha ka kam ïada ri, ka khaii pateng bad ki kam duriaw kiba dang mih.
Ka INS Vikrant, ka jhad kit liengsuiñ jong ka India ba shna nyngkong duh hapoh ka ri bad ka lieng iapom ba heh tam ba la shna ha ka ri, ka dei kawei na ki projek ba kongsan ba la ïakren ha kane ka jingleit jngoh.
La shna da ka CSL na ka bynta ka Indian Navy, ïa kane ka lieng kit liengsuin la pyllait paidbah da u Myntri Rangbahduh u Narendra Modi ha ka jaka shna lieng ha u bnai Nailur 2022. Ka jingshna ïa ka ka long u mawmer ba kongsan ha ka bor treikam jong ka India ban shna ïa ki lieng iapom hapoh ka ri.
Ia kane ka kynhun la ai jingtip lyngkot da u Ashley Gomez, Senior Manager (Administration) & PRO, Cochin Shipyard Limited, halor ka jingkyntiew ia ka jaka shna lieng, ki jingdon jingem, ki projek ba kongsan bad ki jingtreikam ha kylleng ki bynta bapher bapher jong ka kam.
Ki nongthoh khubor ki la leit ruh ban jngoh ia ka New Dry Dock, kaba la plie da u Myntri Rangbahduh ka ri u Narendra Modi ha u bnai Kyllalyngkot 2024. La shna ha ka jinglut kaba T.1,799 klur, kane ka jaka ka jrong 310 meter bad ka pyngkiang 75 meter bad ka lah ban buh ia ki lieng kit liengsuin kiba heh haduh 70,000 ton, kumjuh ruh ki lieng ba heh ba iadei bad ki kam khaii pateng, ki jhad kit LNG, ki jack-up rig bad kiwei kiwei ki jhad ba kyrpang.
Ha ka jingplie paidbah, u Myntri Rangbahduh ka ri u Modi u la batai ïa kane ka jaka kum ka dak jong ka jingsarong ia ka ri bad ka jingtbit ha ka kam engineering. U Myntri Sorkar pdeng ba dei peit ia ka Tnad Ports, Shipping and Waterways, u Sarbananda Sonowal, uba la don lang ha katei ka sngi, u la ban jur ia ka bynta jong ka ha kaba pyniar ia ka jingshna lieng bad ka jinglah ban maramot ia ki lieng ha Kochi.
Ha ka ‘Smriti’ Model Room, la batai lyngkot ia ki nongthoh khubor halor ki bynta jong ka jingsaindur bad jingthmu ban shna ia ki lieng. Nangta ka kynhun ka la leit jngoh ia ka jaka shna lieng, ha kaba ka la sakhi ia ki kam shna tiar bad la ai jingtip shaphang ki kyrdan bapher bapher kiba don bynta ha kaba shna ia ki lieng.
Ka CSL ka la sdang palat 500 tylli ki projek tei jingtei ba thymmai bad palat 2,500 tylli ki projek maramot ia ki lieng. Ka kam shna lieng jong ka ka kynthup ia ki lieng ha ka kam khaii kum ki lieng kit mar, ki lieng kit umphniang, ki lieng kit container bad ki lieng ba kit ia ki nongleit nongwan, bad kumjuh ruh ki lieng elektrik, ki lieng tan um, ki lieng kit mar, ki lieng kiba don sha duriaw bad ki jaka buh lieng.
Ka kynhun ka la leit jngoh ruh ia ki jaka maramot lieng bad la ai jingtip shaphang ka jingmaramot bad pynbha ia ki lieng jong ka Indian Navy bad ki lieng ba iadei bad ki kam khaii. Ka CSL ka don ïa ki jaka ba kyrpang na ka bynta ban maramot ha ki dry dock ïa ki jhad kit liengsuiñ jong ka Indian Navy bad ka la shimti ïa ki kam maramot bad pynbha ïa ki jhad kiba kynthup ïa ka INS Viraat, INS Vikramaditya bad INS Vikrant.
La pynshai ruh ïa ki nongthoh khubor shaphang ki kam ba dang shen jong ka CSL ha ka liang ka teknoloji ba iadei bad ka kam duriaw kaba iahap bad ka mariang. Ka jaka shna lieng ka la sdang ban shna saw tylli ki lieng kiba tan ia ki lieng kiba heh kiba pyndonkam da ki battery na ka bynta ka Svitzer, ka bynta jong ka jingkylla kaba nangkiew sha ki rukom pyniaid lieng kiba kham khuid na ka bynta ki jingtreikam ha ki kad lieng.
Ka kynhun ka la leit jngoh ruh ia ka International Ship Repair Facility, kaba don ia ka kor kaba lah rah ia ki lieng kiba haduh 6,000 ton bad bun tylli ki jaka treikam. Kane ka jaka ka long shi bynta jong ka jingdon jingem jong ka CSL ban maramot ïa ki lieng bad la thmu ban kyntiew ïa ka bor jong ka India ban maramot ïa ki lieng hapoh ka ri.
Ka CSL mynta ka don palat 10,000 ngut ki briew bad ka trei bad palat 500 ngut ki nongdie jingdie kiba treikam. Ki jingtreikam jong ka ki bteng ha kylleng ki hynniew tylli ki jaka, ha kaba ki kam ki kynthup ia ka jingshna lieng, ka jingmaramot ia ki lieng, ka kam shna jingshna kaba iadei bad ki duriaw bad ki jingshakri kiba iadei bad ka kam duriaw.
Na ka bynta ki nongthoh khubor kiba la leit jngoh, kane ka jingleit ka la ai lad ban peit bniah dalade ïa ki jingdon jingem bad ki rukom treikam kiba don bynta ha kaba shna bad maramot ïa ki lieng kiba heh, bad ban sngewthuh ïa ka bynta jong ka jaka shna lieng kaba heh ha ka liang ka kam duriaw bad ka kam ïada ri jong ka India.
