Shillong, Nailur 10: Ka North East Students’ organization (NESO) kala pynpaw ka jingpynrem bad jingbitar halor ka jingshah pyniap jong u Chongtham Vikram Singh, uba la don 55 snne ka rta uba dei u nongrwai jong ka jylla Manipur bad u la khlad noh na ka jingmynsaw kaba jur jong u na ka jingshah thombor jong u ha ki katto katne ki kynhun shynrang shabar ka iing sah jong u ha Kilokari, Southeast Delhi.
Ka seng NESO kala sngew diaw ba tang na ka daw jong ka jingpyrshah jong u iaka jingsngew thut jong u kaba la mih na bar surok kan lam shaduh ka jingduh ei ia la ka jingim. Kumta kila dawa na ki bor ba dei peit ba kin shimkhia mar mar ia kane, nym leh shiliang bad tohkit bha bad pynthikna ba dei ban pynshitom da ka ain ia kito kiba donkti ha kane ka kam pyniap. Ym dei ban pynslem ban ioh iaka hok, lane kyntait.
Ka jingshah pyniap jong u Chongtham Vikram Singh kam dei kaei kaei kaba lah ban klet ha kaba bun ki paidbah na ka thain shatei lam mihngi kila ngat ha kum ka jingshah peit shiliang khmat, ka jingshah pyn iapher jaitbynriew bad kiwei kiwei ha ki katto katne ki sor bah jong ka Ri India.
La don da ki snem ki snem ba ki nong shatei lam mihngi kiba shong ba sah, pule bad trei shabar ka jylla jong ki, ki ju shem ia ka jingshah kren bein kren khoh, jingshah pyn iapher jaitbynriew, jingshah thombor bad kiwei kiwei ki jingshah pyn lehrain namar ka dur ka dar jong ki, ka kyrteng bad ka jaka sah jong ki.
Kum kine ki jingjia kim lah shuh kiba la shu khein sting kum ki jingiapher kiba shimet lane kiba ju long khah-khah. Haba ki paidbah na kane ka thain lam mihngi kim sngew shngain lane kim sngew ioh kata ka jingpdiang sngewbha ha ki jaka bapher bapher jong ka Ri, kane ka pyn kylli jingkylli shaphang ka jingsngew shngain, ka burom bad ka jingbym shah leh shiliang kum ki paidbah ka Ri India, ha kaba ka NESO kala kyrpad iaki bor ba dei peit ba kin shimkhia ia kane ka jingjia mar mar.
Ka jingtohkit ruh ka dei ban long kaba biang bad ym dei ban shah ia uno uno uba don kti ha kane ka kam pyntriem ban lait na ka jingkitkhlieh. Ka ain ka dei ban long kawei bad kaba beit, watla ki nongleh kam sniew ki dei kiei kiei lane na ka longiing kaba kumno kumno.
Ha kajuh ka por, ka kynhun NESO kala kyrpad iaka bor sorkar bad ki nongpyn jari ain bad kin shim ia kane kum ka jingeh kaba kham iar halor ka jingpynkhein iaki hok bad ka jingleh bein lane jingpynshitom iaki briew na ri lum mihngi. Dei ban pyndon iaki lad ai jingiada, jingpyn treikam ba tei iaka ain, ka jingpynsngewthuh bad jingpynshai paidbah ia ki pulit bad ki shlem treikam ka sorkar bad ka buit na ka bynta ban pynthikna ka jingshong shngain bad ka burom jong ki paidbah ka thain lam mihngi.
Ka jingkhlad jong u Chongtham Vikram Singh kam dei satia ka jingjia jong ka apot sepngi iaki bahaiing ha sem jong u bad ki ba ieid bathoin, hynrei ka dei kawei na ki jingjia kaba ktah iaka imlang sahlang jong ka thain lam mihngi baroh kawei. Ym don u briew uba dei ban tieng ia la ka jingim tang namar ba u dawa iaka hok jong u ban ioh iaka jingsuk bad ka jingshngain ha la iing la sem.
Ka kynhun NESO ka ieng tylli bad ki bahaiing ha sem jong u Singh bad ki paidbah ka jylla Manipur ha kum kane ka por ba sngewsih. Ngi dawa iaka hok na ka bynta jong u Chengtham Vikram Singh bad dei ban kem naphang ia kito kiba donkti halor ka jingiap jong u, ong u bah Samuel Jyrwa, uba dei u Chairman ka NESO bad u Mutsikhoyo Yhobu, uba dei u Secretary General ka NESO ha ka jingpyllait paidbah shaphang kane ha ki lad pathai khubor mynta ka sngi.
