Shillong, Nailur 10: Ka National Conference kaba lai sngi halor ka “Natural Farming: Pathways to Self-reliant Farming and Rural Prosperity (NCNF 2026)” ka la sdang mynta ka sngi ha ka College of Post Graduate Studies in Agriculture Sciences (CPGSAS), Umiam. Ia kane ka jingialang la pynlong da ka Central Agricultural University (CAU), Imphal.
Ha ka jingialang plie pyrda la iadon lang u Lakshman Prasad Acharya, Lat ka jylla Assam kum u Kongsan, katba ka Dr. Joram Aniya, Member, NITI Aayog, New Delhi, ka la iadonlang kum ka symbud kongsan. Ha kane ka sngi la don lang ruh katto katne ngut ki stad saian ba pawkhmat ha ka rep ka riang, ki Vice-Chancellor jong ki skulbah ba pawkhmat ha ka rep ka riang bad ki nongmihkhmat na ki kynhun jong ki nongrep.
Haba ai jingkren ha kane ka jingialang, u Lat u la ban jur ia ka jingdonkam ban pyniasohlang ia ka jingstad tynrai jong ka India ha ka ka rep ka riang bad ka jingsaindur thymmai katkum ka jingstad saian ban kyntiew ia ka rep ka riang kaba iaineh bad kaba lah ban kyrshan dalade.
Haba ban jur ia ka jingiar jong ki jingdon jingem ha ka mariang bad ka jingiar ha ka rep ka riang ha ka thain shatei lammihngi, u la ong ba kane ka thain ka don ka lad kaba khraw ban paw kum ka jaka pdeng jong ka rukom rep tynrai. U la ban jur ruh ia ka jingdonkam ban don ki kam kiba khlain bad ban kyntiew ia ka lad ban ioh rung sha ki iew ki hat ban kyntiew ia ka ioh ka kot jong ki nongrep.
U Lat u la ban jur ba ka rukom rep tynrai kadei ban noh synniang ban kyntiew ia ka ioh ka kot jong ki nongrep lyngba ki kam kiba khlain kiba kynthup ia ka jingpynmih, ka jingpynkhreh, ka jingsong, ka jingpyniaid iew bad ka jinglah ban iohrung sha ki iew ki hat. U la kyntu ruh ban kyntiew ïa ki mar ba la ioh jingithuh GI bad kiwei kiwei ki mar tynrai hapoh ka jingthmu “Local to Global”.
Da kaba ban jur ia ka jingdonkam jong ki rukom rep kiba lah ban iaineh kiba iadei bad ka khyndew, ka suinbneng bad ki jingdon jingem jong ka thain, u la kyntu ia ki stad saian, ki nongrep bad ki nongthaw polisi ban pyniasoh lang ia ka jingstad tynrai bad ka jingwad bniah kaba katkum ka juk mynta ban kyntiew ia ka rukom rep tynrai kum ka jingkhih jong ki paidbah.
Ha kane ka jingialang plie, u Lat u la pyllait paidbah ia ki kot kiba iadei bad ka rukom rep tynrai, kaba kynthup ia ka Abstract Compendium, ka Poster Book bad ka Media Chronicle.
Ka Dr. Joram Aniya ka la ban jur ia ka jingiadei kaba jan hapdeng ka jingkoit jingkhiah jong ka khyndew, ka jingbha jong ki jingbam bad ka bha ka miat jong ki briew bad u la ban jur ia ka jingdonkam ban pynduna ia ka jingshaniah palat ha ki jingpyndonkam ia ki dawai. Ka la ong ba ka rep ka riang kaba iaineh kan don ka bynta kaba kongsan ban pynurlong ia ka jingthmu jong ka Viksit Bharat 2047.
Haba pdiang sngewbha ïa ki kynrem ki lyndan bad ki nongïashim bynta, u Dr. Anupam Mishra, Vice-Chancellor, CAU, Imphal, u la ban jur ïa ka jingdonkam ban wanrah lang ïa ki nongrep, ki nongwad bniah, ki nongthaw polisi, ki jaka pule bad kiwei kiwei kiba don bynta ha kane ka kam ban ïamir jingmut halor ki lad treikam na ka bynta ka rep ka riang kaba iaineh bad kaba lah ban kyrshan dalade.
Kane ka jingialang kaba lai sngi, kaba la pynlong ha ka jingiatreilang bad ka ICAR, New Delhi; DST–NECTAR, Shillong; Rani Lakshmi Bai Central Agriculture University, Jhansi; Dr. Rajendra Prasad Central Agricultural University, Pusa; bad ka Gujarat Natural Farming Science University, ka la wanrah lang kumba 500 ngut ki nongiashim bynta, ba kynthup ia ki nongrep, ki nongrep kiba dang pyndonkam ia ka rukom rep tynrai, ki nongthaw polisi, ki nongwad bniah, ki samla pule, ki nongmihkhmat na ki karkhana bad ki riewshemphang ha ka kam.
