Shillong, Nailur 11: Ka Branch MSME Development bad Facilitation Office (BrMSME DFO), Shillong, ka Ministry Micro, Small bad Medium Enterprises, Sorkar India, ka la pynlong ia ka PM Vishwakarma Awareness Programme ha Thadlaskein C&RD Block, West Jaintia Hills, Meghalaya, ha ka 10 tarik u Nailur 2020. Ka prokram ka pynleit jingmut halor ka jingpyniaid iew ia ki mar ba shna da ki nongtrei kti hapoh ka PM Vishwakarma.
U Prabhat Kumar Singh, IEDS, Assistant Director Grade-I, BrMSME DFO, Shillong, u la ai ka jingpynshai halor ka skhim PM Vishwakarma bad ki bynta bapher bapher jong ka.
Ka prokram ka kynthup ïa ki jingïalang halor ka jingpyniaid iew, ka jingsong ïa ki mar, ka jingpyndonkam ïa ka Artificial Intelligence (AI), ka jingai jinghikai shaphang ki kam pisa tyngka, ki jingsiew digital bad ka jingpynmih QR-code, ki skhim jingïada ha ka imlang sahlang bad ka Udyam Registration.
Kane ka prokram ka la bud ïa ka rukom ïatreilang jong ki bun tylli ki tnad treikam, ha kaba la ïashim bynta da ki ophisar bad ki nongmihkhmat jong ka Tnad Commerce & Industries, Sorkar Meghalaya, ka State Bank of India, ka India Post Payments Bank bad kiwei kiwei kiba don bynta ha kane ka kam.
La iasam ia ki jingtip shaphang ki skhim Sorkar kiba iahap, ki jingshakri ha kaba iadei bad ka kam pisa tyngka bad ka jingkyrshan kaba lah ban ioh da ki nongtrei kti ha ki jingialang.
La pynlong ruh ia ka camp ban pynsuk ia ka jingpynrung kyrteng Udyam na ka bynta ki nongtrei kti. Ka prokram ka kynthup ia ka jingiasam ia ki khana jingjop jong ki nongtrei kti ban batai ia ki nongiashim bynta shaphang ki lad ki lynti kiba ki lah ban shim ha kaba iadei bad ka jingkyntiew ia ki kam, ka jinglah ban ioh ia ki iew ki hat bad ka jingpyndonkam ia ka jingkyrshan jong ka Sorkar.
Ia kane ka prokram la pynlong da ka jingthmu ban wanrah ka jingsngewthuh hapdeng ki nongtrei kti tynrai ha kaba iadei bad ki jingkyrshan ba lah ban ioh na ki jaka treikam bad ki lad ki lynti na ka bynta ban kyntiew ia ka jingtbit, ka jingpynskhem, ka jingbei tyngka, ka jingpdiang ia ki lad digital, ka jingpyniaid iew bad ka jinglah ban ioh ia ka iew hapoh u PM Vishwakarma bad kiwei kiwei ki sienjam jong ka Sorkar kiba iadei bad kane.
