Shillong,Nailur 10: U Myntri Rangbah ka Jylla Conrad K. Sangma mynta ka sngi 10/Nailur/2026 ula plie paidbah ia ka Block Integrated Development Complex ka Rongara C&RD Block ha South Garo Hills District.
U MLA ka Siju-Rongara u Rakkam A. Sangma ula ia don ryngkat ha kane ka jingialang haba ai jingkren, u Myntri Rangbah ula ai ka jingiaroh ia u MLA namar ka jingtrei shitom jong u bad ka jingaiti lut sha ki paidbah ka constituency jong u.
“Kane ka iing thymmai ka block ka dei u soh jong ka jingtreikam ba shisha jong u MLA bad ka jingiohi jngai na ka bynta ka roi ka par jong ka thain.U la kyntu ia ki nongtrei jong ka Block ba kin shakri ia u paidbah da ka jingleh hok bad jingaiti lut.
“Ha ki jaka kyndong, ki paidbah ki ju leit sha ki Ophis ka Block da ka jingkyrmen ba kan weng ia ka jingeh jong ki. Ki nongtrei ki dei ban shahskhor ia ki, bad ban sngewthuh ia ki jingeh jong ki bad ban wad ia ki lad kumno ban weng ia ki.
U Myntri Rangbah ula ong ruh ba ka sorkar kala shna ia ki jingtei ha kylleng ka Jylla ha kine ki lai snem ba la leit noh.U ong baroh 56 tylli ki C&RD Block ha Meghalaya ki dei kiba la dep maramot pura lane kiba la shna da ki iing thymmai. Ka jingthmu ka long ban pynjanai ia ka jingai jingshakri ia u paidbah bad ai ia ka jaka treikam kaba kham biang ia ki nongtrei.
U Conrad ula ban biang ia ka jingkut jingmut jong ka Sorkar ban wanrah shajan ia ka synshar khadar sha u paidbah bad ban kyntiew ia ka roi ka par, khamtam ha ki jaka kyndong bad jaka khappud.
