Shillong, Nailur 11: U Myntri Rangbah ka Meghalaya Conrad K Sangma mynta ka sngi ula plie paidbah ia bun tylli ki kam pynroi bad buh maw nongrim ia ki project kiba kongsan ha Tikrikilla bad Raksamgre ha West Garo Hills.
Ia u Myntri Rangbah la synran da u Myntri ki kam jngohkai Timothy D Shira, u Symbud Lamphang Limison D Sangma, MLA Jimmy D Sangma bad CEM ka GHADC Dhormonath Sangma ha ryngkat ki Heh Ophisar jong ka District.
Ki project bala plie paidbah bad ki maw nongrim ba buh ki kynthup, kajingbuh mawnongrim ia ka jingkieng maw (PWD Roads) ha Jangrapara, Raksamgre, Plie ia ka Tourism Guest House ba thymmai ha Nagargaon, Tikrikilla bad buh mawnongrim na ka bynta ka Tourism Guest House ba thymmai ha Raksamgre.
Ha kane ka jingialang, u Myntri Rangbah ula plie paidbah ruh ia ka Agro Processing Unit shimet ba dang shu plie thymmai-ka Megha Agro Gold ha Tikrikilla, ka ban tylliat ia u kwai, sohtrun bad sohphan ba pynmih na ka thain.
Haba ai jingkren, u Myntri Rangbah ula ong baka Sorkar kala pynleit jingmut ha ka roi ka par bad ka jingkiew shaphrang jong ki jaka nongkyndong bad ki jaka ba don sha jngai eh jong ka Jylla.
“Ka jingpyniasoh surok ka dei kaba iasoh beit beit bad ka jingroi ka ioh ka kot bad kyntiew ia ka kamai kajih. Ta ka daw ngi la buh hakhmat eh ia ka kam shna surok” ong u Myntri Rangbah.
Haba kdew ia ki jingkylla ha ri-lum Gari, ula ong “Ka surok na Baghmara sha Rongara mynshuwa ka ju shim por kumba 3 kynta. Mynta ka shimpor tang 30-45 minit. Na Rongara sha Ranikor kaba ju shim por mynshuwa 3 kynta, mynta ka shim por tang 1 kynta”.
U pyntip ba ha ki 7-8 snem bala leit, ka Sorkar kala shna ia jan 3,500 km ka surok thymmai ha ka Jylla, kaba long 1.1km ka surok man ka sngi. Ula ong ba ia kum kane ka jingshna surok ym pat ju sakhi ha ki 20 snem bala leit noh.
“Ka roi ka par kam lah ban jia tang ha ka shimiet, hynrei ngi hap ban buh mawnongrim ia ka jingkiew shakhmat. Ngi la tei ia ki jingtei, hynrei ngi hap ruh ban siew ia ka tulop sha ki nonghikai bad ki nongtrei. Ngim don satia ia ka mang tyngka kaba pahuh, hynrei ngi hap ban jied ia ki kam kiba kongsan bad trei naduh ka mynsiem” ula bynrap.
Haba kdew ia ki jingpyniasoh ban sa leh hadien, u Myntri Rangbah ula ong ba ka jingkieng Dhubri-Phulbari, ka project ba T.3,500 klur bad ka jingkieng kaba jrong eh ha ka thain lam mihngi, kala jan dep artad. U ong ba ka jingkieng kan plie ia ka lynti jong ka khaii pateng na ka bynta ka thain Shatei Lam Mihngi baroh kawei.
“Ngi la tyrwa ia ka surok kaba heh bha-Dalu sha Baghmara, Baghmara sha Ranikor, Ranikor sha Shella bad Ratacherra shaduh sha khappud ka Bangladesh. Ynda la pyndep ia kane, kan sa pyniasoh ia ka Silchar, Manipur, Mizoram bad Tripura bad kan pynkylla ia ka khaii pateng bad ka iaid ka ieng ha ka thain” ula ong.
U Myntri Rangbah u ong ba nalor ka surok, ka Sorkar kala trei ruh ia ka kam ban pynbun ia ki jingtei kiba donkam jong ka imlang sahlang. Ula pyntip ba palat T.200 klur la mang ha kine ki 4 snem na ka bynta ki 56 tylli ki Block ha baroh kawei ka Jylla ban tei bad pynbha ia ki skul, ki ophis jong ki block bad ki jaka sumar.
U Myntri Rangbah ula ai ka jingiaroh ia ka GHADC hapoh ka jingialam u CEM Dhormonath Sangma bad ia baroh ki MDC kiba la wanrah ia ki jingpynkylla kiba khraw hapoh ka Council.
Ha kane ka sngi, la pyllait ruh ia artylli ki prokram jong ka Council, ka GHADC Patta Management System (PMS) Portal, Ka rynsan digital ban pynbeit ryntih ia ki dulir khyndew bad jingpyniaid ia ki patta. Kane ka system kan wanrah ia ka jingtreikam kaba shai, pynsuk ia ki nongshongshnong ha ka jingleh ia ki kot ki sla khyndew bad kyntiew ia ka jingai jingshakri ha ki jaka ba hap hapoh ka GHADC.
Service Conduct Rules Book: Ka Rulebook kaba bniah na ka bynta ka jingtreikam bad ka rukom treikam jong ki nongtrei ka Council, kaba thmu ban wanrah ia ka jingtreikam kaba tbit, kaba don jingkitkhlieh bad kaba don discipline.
Halor ka Separate Electoral Roll (SER), haba niew kum ka rai kaban sah khana, u Myntri Rangbah ula kren halor ka jingpyntreikam ia kane ka SER. “ka SER ka dei ka rai kaba heh bha. Ngi la mynjur ia ka rules bad la pynbeit shisyndon ia ka jingeh kaba la sahteng la slem bha” ula ong.
Ula pynshai, “Ki bar Jylla kim dei ban sngew mong. Ngim long pyrshah ia kano kano ka jaidbynriew. Ngi la ia imsuk imsain da ki snem bad ngin iai im lang bad iatrei lang. Kane ka rai ka long kaba donkam ban wanrah ia ka jingshai bad ban iada ia ka bha ka miat jong ka jaidbynriew riewlum jong ngi”.
