Shillong, Nailur 23: U National President ka National People’s Party u Conrad K. Sangma u ba dei ruh u myntri rangbah ka jylla u la ong ba kane ka jingkylla ha ka sain pyrthei kam don jingiadei eiei ruh em bad ka party bad ka jingdon ki MLA ha ka sorkar synrop ki neh kumjuh.
Kane ka jingjia ka dei ka rai jong ki MLA hapdeng ki ar tylli ki party bad kane ka dei ka jingkwah ka jong ki bad um don eiei ban ong ia ka rai ka jong ki bad ka jingdon ki MLA hapoh ka sorkar synrop ki don kumjuh bad kane ka jia hapdeng ki MLA kiba don bad ka sorkar.
Kane ka jingrung ki MLA ka UDP sha ka BJP kan nym don kano kano ka jingpynthut ia ka jingtreikam ka sorkar bad lada ka don ruh baroh iatip ba ka party NPP ka don ia ka jingbun paid ha ka iing dorbar bad ka don ka jingkyrmen ba kiei kiei baroh kin long kumba ju long ia kaei kaba ki don ba balei ki rung ia kata um lah ban ong eiei.
Haba jubab ia ka jingkylli u myntri rangbah u la ong ba kam shym don kata ka jingdawa ban ia bujli myntri bad ka dei ka kamram jong baroh ki Political Party ba kin ia pyrshang la ka jong ka buit ka bor ban pynheh ia ka party ha ka synshar paidbah wat ka NPP ruh ka pyniar ia ka party sha kiwei ki jylla.
Kaei kaba ki hap ban leh kum ka party ba kin pynkhlain ha la ki jong ki jong ki jaka namar ia ka elekshon ki hap ban iakhun hala ki jong ki jong ki nongrim bad kane kan long ruh wat ha ki por ki ban dang wan.
Haba iadei bad u dewiong u myntri rangbah u la ong ba um don eiei ban ong kaei kaba u kwah ban iohi ka long ban weng ia ki jingeh dei ha u snem 2019 ba ki la jop ia ka mokotduma bad la shah ban tih dewiong hynrei hap ban bud ia ki kyndon MMDR Act.
