Shillong, Nailur 23: u bah Boswell S. Pala u President ka Khasi – Jaintia Deficit School Teacher Association u la pyntip ba kan don ka jingiaid paidbah da ka ki nonghikai deficit ha ka 25/Nailur/2026 kaba kin pynlong ha Madan Malki.
Ha ba kren ha ki lat pathai khubor ha Shillong Press Club u bah Boswell u la ong ba kata ka jingiaid paidbah kan sdang na khmat ophis jong ka Meghalaya Board of School Education bad kin pynkut ha Madan Malki.
La ong ba jingthmu jong kane ka jingiaid paidbah ka long ban pynsngew sha ka sorkar namar baroh shi katta ka sorkar ka khlem sngap ia kaei kaba ki dawa, ba ka sorkar kan pyntreikam noh ia ka Contribution Provident Fund, ka National Pension Scheme kaba kila dawa naduh u snem 2023-2024 ia kaba kila kdat noh shawei ha u snem 2025-2026.
Kane ka Skhim ka dei Meghalaya Non-Government School and College Employees Provident Fund Scheme 2026 ka dei ka skhim kaba kila kyntait naduh kaba sdang namar ka dei ka skhim ka bym don nongrim ha ka ain bad kawei pat ka jingdawa ka long ban pyllait ia ka DA kaba 51% bad 53% kaba la dei naduh u Naitung 2025 bad ban pyllait ia ka Arrear kaba 43% kaba dei jong u bnai Kyllalyngkot bad Rymphang 2024.
Ha kajuh ka por ki dawa ruh na ka sorkar ban pyntreikam noh ia ka CPF Contribution kaba 10% na ka tulop jong ki bad ban thung noh ia ki nonghikai kiba dei ha ka deficit ha ki skul bapher bapher kloi lan bad ban don ka bor ban peit na ka bynta ki nonghikai kiba la thung shwa u snem 2010 bad ba ka sorkar kan siew ia ka tulop kaba man u bnai.
