Delhi, Nailur, 23: Ha ka jingdon ka jingiakhih bad lai sngi ha baroh ka ri India ba la pynlong da ka United Forum of Bank Unions (UFBU) naduh ka 28 haduh 30 tarik Nailur, 2026, kaba long ka jingai shuti pat ha ka 26 bad 27 tarik Nailur, kumta ka sorkar kala shim iaka lad ban pynbiang iaki jingdonkam jong ki paidbah.
Ha ka jingpyn thikna halor ka jingdonkam jong ki paidbah ba kan nym ktah ha kane ka por, kumta baroh ki Public Sector Banks bad ki Regional Rural Banks kin treikam ha ka sngi u blei kata ka 27 tarik Nailur, 2026.
Ka Reserve Bank jong ka India kala ai jingbit ia baroh ki ophis jong ki bank, ophis, ki branch ba iadei bad ka ATM bad ki Currency Chests ba kan treikam pura ha ka 27/Nailur/2026.
Ka tnad kala don ka jingthmu ban peit iaka bha ka miat bad kiwei kiwei ki jingdonkam jong ki paidbah bad kane ka long kaba kongsan ba ka sorkar ka leh. Ka Sorkar bad ki nongpyniaid bank kila kyntu iaki union ban pynngeh shuwa iaka jingiakhih kaba la thmu ban pynlong bad kila shim ruh iaki sienjam ban pynshisha ba ki kam bank kiba donkam tam kin iaid beit khlem da thut.
