Shillong, Nailur 23: U bah Kyrshanborlang Thabah na shnong Umrynjah East Khasi Hills District u la kyndit thret haba ki pulit na Jowai, ki pulit na Sardar Police Station Shillong kila khot hajir ia u namar ba kala don ka jingdawa pisa na ki riew shimet da kaba pyndonkam ia ka sim card jong u.
Haba kren ha ki lat pathai khubor mynta ka sngi 23/Nailur/2026 ha Shillong Press Club u bah Thabah u la ong ba nyngkong u la ioh ia ka phone na ki pulit ka Jowai ba u dei ban wan hajir namar ba kala don ka jingdawa pisa da u mobile nombar ha ka kyrteng jong u.
Ha ka sien kaba nyngkong um shym la leit hynrei ynda la poi ka shithi shah khot hajir ha Umshing Police Out Post bad la bthah ia u ban leit mih ha Pasteur Beat House ha kaba u la leit bad ha kane ka jingleit u la ong ba kila don ruh kiba la shah dawa pisa bad ynda la poi kila ong ba um dei une u briew dei da kiwei pat.
U la iathuh ruh ba u la leit sha Jowai Police Station ha kaba la don lang ki nongshah dawa pisa haba la ia kren ki ruh kila ong ba um dei une u briew bad hadien kata ynda la shah khot ha Sardar Police Station Shillong hangne ruh kiba shah dawa pisa ki la ong ba um dei une u briew u ba wan shim pisa.
U la iathuh ba kiba dawa pisa kila kam ialade ba u dei u pulit jong ka Sardar Police Station dei hadien jong kane ba u la leit noh ban ujor da ka ejahar ha Lumdiengjri Police Station ha ka 21/Nailur/2026 katba ia ka ejahar ka ba iadei bad u mobile nombar u la ai ha Lumdiengjri Police Station ha ka 15/Nailur/2026.
U bah Kyrshanborlang u la ong ba ka jingshahtuh ka mobile jong u ka long ha ka 21/Jymmang/2026 bad u khlem leit ban ujor namar um shym poi pyrkhat ba kan long ha kane ka rukom bad na ka liang une u rangbah u kyntu ia ki pulit ba kin kem ia kito ki briew kiba pyndonkam bakla ia ka nombar mobile jong u.
