Shillong, Nailur, 26: Ka kynhun ki nongthaw ain bad ki heh nongtrei jong ka jylla Meghalaya, ba la lam khmat da u Lamphang, u Thomas A. Sangma, kala leit jurip iaka Pieta Military Cemetery kaba dei ka lum jingtep ba don ha Malta bad kala lap iaki jingtep jong ki saw ngut ki nongbylla ba dei na ka thain Garo kiba la ju trei ha ka 69th Garo Labour Company ha ka por ba don ka thma bah ba nyngkong.
Katei ka kynhun kala pyn don burom ia kine ki saw ngut ki rangbah na ka Ri Lum Garo kiba la shah tep ha kane ka lum jingtep ba la tip kum ka Commonwealth kaba la peit bha da ki shipai ha Pieta.
Ha katei ka jingleit jurip, la lap iaka jingtep jong u Khew Marak, uba la khlad ha ka 15/Jylliew/1918 bad la lah ban sngewthuh ba ka dei ka jingtep jong uwei na ki dkhot ka 69th Garo Labour Company ba na ka thain Ri Lum Garo ha katei ka jingtep.
Ha katei ka jingleit, katei ka kynhun kala ithuh ia kitei ki jingtep jong ki lai ngut ki rangbah na ka thain Garo ba kyrteng u Ading Marak, uba la khlad ha ka 10/Jylliew/1918, u Sangjim Sangma, ba la khlad ha ka 19/Jylliew/1918 bad u Join Marak, uba la khlad ruh ha ka 10/Jylliew/1918.
Katei ka jingshem ia kine ki jingtep ka pynioh iaka jingiadei ba kongsan hapdeng ka histori jong ka jylla Meghalaya bad ka khana kaba kham iar shaphang ka jingnohsynniang ka ri India sha ka jingialehthma ki paralok ha ka thma bah ba nyngkong.
Kine ki rangbah na ka Ri Lum Garo kila shah thung ha ka 69th Garo Labour Company, kiba kyrshan iaka jingiatreilang shi paralok da kaba shimkhia iaki jingtrei ba donkam kum ka jingmaromot iaka surok bad ka jingkhaii iaki mar ki mata.
Ha ka jingpyndon burom ia kine ki rangbah, u Lamphang, u Thomas A. Sangma u la ong ba ha katei ka jingleit jurip, kala long kaba kongsan na ka bynta ka jylla Meghalaya naba kane ka wallam sha ka jingshai iaki jingtep ba sahnam ba khadduh jong kine ki ragnbah Garo, kiba ka jingnohsynniang bad ka jingaiti jong ki kala sah hapdeng ka jingbymtip haduh katne.
Katei ka kynhun ka kynthup ia u Symbud Lamphang, u Limison D. Sangma, u Symbud ba bat shabuk, u bah Ronnie V. Lyngdoh bad u shongknor jong ka Meghalaya Tourism Development Corporation, u Marthon J. Sangma.
Ha katei ka jingleit jurip ba la synran lang da katei ka kynhun, ki long ki nongthaw ain, u Secretary, u Malthus S. Sangma bad u Symbud Secretary, u bah Raja Kharpuri.
Ka jingleit sha Malta kala pynioh iaka bynta ban bishar bniah hadien ka jingialang kaba la long ryngkat bad ka kynhun kaba leit iashim bynta ha ka Commonwealth Parliamentary Association (CPA) Conference ha Cape Town, South Africa.
Katba ka jingleit sha une u Lum jingtep Pieta Military kala long ka jingai burom da ka High Commission ka India ha Malta, kaba la pynlong ia kane ka kynhun na Meghalaya ba kin pyndon burom ia kine ki jingtep bad ka pyni iaka jingdon kine ki shipai Garo bad ki nongbylla kiba la shong trei shabar ri ha ka por ba don ka thma bah ba nyngkong.
Ka jinglap ia kine ki lai tylli ki jingtep ka pynpaw iaka por ba kongsan ha kaban pynneh pynsah bad ithuh iaka histori kane ka thma bah ba nyngkong jong ka Ri Lum Garo bad Meghalaya, katba dang pynskhem biang iaka jingiasnoh kaba neh barabor hapdeng ka histori jong ka jylla bad ki jingjia ha ka pyrthei ha ka thup snem kaba arphew kaba dang jia dang shen.
