Shillong, Nailur 26: Ka Jaintia Students Union (JSU) seng kmie kala pynmih da ka jingpynbna da kaba maham tyngeh iaki Regional Managers, Branch Managers bad ki khlieh nongpyniaid jong baroh ki tnad pisa pilain ba kin pyntreikam hapoh ka jylla jong ka Meghalaya ban plie bank lashai ka sngi u blei.
Kane ka jingbthah ka kynthup shai ia baroh ki Commercial Banks, Small Finance Banks (SFBs), Co-operative Banks, Regional Rural Banks (RRBs) bad kiwei kiwei ki ophis ka tnad pisa, kaba kynthup iaki tnad treikam ka sorkar, shimet bad kyntoit treikam ka sorkar (PSU).
Kila pynpaw lyngba kane ka jingbthah ia baroh ki tnad treikam jong ki bank, khamtam kito kiba pyntreikam ha kylleng ka East Jaintia Hills bad West Jaintia Hills distrik, ba ki dei ban khang ha ka sngi u blei kata ha ka27/Nailur/2026.
Ka seng JSU kala kam ba ka jylla Meghalaya ka dei ka jylla ba don bun ki Khristan, ha kaba ka sngi u blei ka dei ka sngi kaba khuid jong ki kaba baroh ki leit jingiaseng, pynlut por bad ki bahaiing ha sem bad kiwei kiwei.
Kane ka jingbthah kala hukum iaki bank ba kum ka jingpyntreikam ban plie iaki bank ha ka sngi u blei ka pynpaw iaka jingibein iaki Khristan bad ka hok longbriew manbriew jong ki riewlum.
Ka seng JSU kan nym lah pdiang ia kane ka jingpyn treikam ia baroh ki bank ban plie ha ka sngi u blei bad kan nym pyndam ne knieh noh iaki rukom niam kiba la thung ha kane ka jylla.
La bynrap da kaba ong ba ka seng JSU kala pynmih da kane ka jingpynbna kaba kyrkieh iaki MLA ba thymmia jong ka BJP ha Meghalaya ban treikam kloi.
La ong ba lada kine ki nongmihkhmat ki da sngew shisha na ka bynta ki paidbah ka imlang ka sahlang ki Khristan bad ong ba ki thrang ban pynbiang iaki kam ki jam na ka bynta ki Khristan jong kane ka jylla, ki dei ban sangeh mar mar bad shimkhia halor kane ka mat.
Ka long ka kamram jong ki ban tuklar bad ban pynshisha ba ka jingmut jingpyrkhat kaba i saitmet jong ka RSS bad BJP, kaba bun ki mut kumba ka long kaba pyrshah iaki Khristan, kan ym ioh jaka lane ban synshar iaki polisi ha Meghalaya. Ka seng JSU ka khmih lynti ba kin ieng ryngkat bad ki briew kiba ki mihkhmat bad ban da iaki sngi shongthait bakhuid jong ngi.
Ka seng JSU ka khmih lynti ba dei ban khang ia baroh ki bank ha ka sngi u blei bad kyrpad iaki bor ba dei peit ba kin burom iaka jingsngew jong ki paidbah.
Ym dei ban pynbor iaka seng ba kin shim kano kano ka lad kaban pynsngewsih iaki. Kila pynmih ia kane ka hukum khnang ban don ka jingshong suk shong sain bad kaba burom iwei ia iwei hapoh kane ka jylla.
Hynrei la kumno kumno kano kano ka bank kaba kyntait bad leh kiar ban peit ia kane ka jingpynbna bad plie iaki bank ha ka 27/Nailur/2026, ka jingkitkhlieh na ka bynta kino kino ki jingpynthut ne ki kam sngewsih ba mih nangta kan hap bah khieh hi ka bor ba dei peit iaki bank bad kiwei kiwei kiba leh kiar ia kane ka jingmaham, la ong u President ka JSU, seng kmie, u samla Jersom Shylla ha ki lat pathai khubor.
