Tura, Risaw 01: La pynlong iaka National Voluntary Blood Donation Day ha Don Bosco College (DBC), Tura ha ka sngi palei lem bad ka prokram ai jinghikai halor u khniang jingpang HIV bad AIDS bad la pynlong ruh da ka prokram ai snam ei ban pynsah jingkynmaw.
La pynlong ia katei ka prokram da ka National Service Scheme (NSS) bad ka Red Ribbon Club (RRC) jong ka DBC Tura ha ka jingiatreilang bad ka Meghalaya State Blood Transfusion Council (MSBTC), Blood Centre, Tura Civil Hospital bad ka Meghalaya AIDS Control Society (MACS).
La pyniaid ia kane ka prokram da ka Tolino Chishi, IAS, SDO Tura Sadar, kaba la pynlong ia kane ka camp ai snam ai ha ka jingia don lang jong ki riewkhraw, kynthup iaki nongsumar ba kham rangbah bad ki heh nongtrei jong ka tnad ka koit ka khiah.
Ha katei ka prokram, ka Tolino Chishi kala ong ba ka por ba dang leit kolej ka dei ka por kaba ki samla ki sdang shim khia iaki rai jong ki bad kala ban jur da kaba ong ba ka long kaba donkam ban pyn mlien iaka jingai snam ei. Kala ong ba tang kawei ka snam ba la ai sngewbha ka lah ban pyllait im iaka mynsiem briew, da kaba bynrap ba ka jingduna jong ki nongai snam ei ha ka jylla Meghalaya kam dei na ka daw jong ka jingbym shim khia hynrei ka daw bakhraw ka dei na ka jingbym pynlong ia kum kine ki prokram ai snam ei.
Kala iakren ruh shaphang jong kiba bun ki paidbah kiba wan shakhmat ban ai snam ei kaba bud da ka jingjia ha u snem 2023 ba don ka jingia takhuh rel ha Balasore, ha kaba kala ong ba bun ki paidbah ki kloi ban iarap ha kum kito ki por ba jynjar. Kala kren ruh shaphang ka jingdonkam ban tip ia u khniang jingpang HIV/AIDS hapdeng ki samla ha kaban pynlong iaki ba kin jied iaka met ba koit ka khiah jong ki bad ka lad ban pynduna iaka jinglehrain bad ki jingmut bakla halor ka jingpang.
Katba ka Jordana Dipsera R. Marak, ba dei ka Assistant Professor bad Nodal Officer, RRC, DBC Tura, kala ong ba kane ka prokram ka don ar tylli ki mat ba kongsan, kawei ka long ka jingtip da kaba iakren halor ka jingai snam ei da ka kong Lugracia M. Shullai jong ka MSBTC bad kaba ar ka long ka jingpyn sngewthuh shaphang u khniang jingpang HIV/AIDS da ka Dr. Rajamoni R. Marak, Medical Officer-in-Charge, ICTC, Tura Civil Hospital.
Kala ong ba kane ka prokram ka thmu ha kaban pynshlur ban ai snam ei, khamtam ha ka jingpeit bniah iaka jingduna jong ki snam ha ki jaka buh snam bad ban nym lehrain ban iakren shaphang kane ka jingpang kaba iadei bad ka HIV/AIDS.
U Rev. Fr. John Paul Tirkey, SDB, Vice Principal, DBC Tura, u la pdiang sngewbha iaki nongiashim bynta bad ki riewkhraw. Kane ka jingrakhe ka kynthup ruh iaka jingsmai ban ai snam da ka mon sngewbha, ka jingpynkup burom iaki nongai snam bad ka jingrwai jingshad kaba kyrpang.
