Shillong, Risaw 01: Ka Ophis jong u Accountant General (A&E), Shillong ryngkat ka jingiatreilang bad ka Tnad Kam Pla Tyngka (Pension Cell) jong ka Sorkar Meghalaya ka la pynlong ia ka Pension Adalat ha ka sngi Thohdieng ba ladep ha ophis treikam jong ka ban pynsuk ia ka jingpynbeit kloi ia ki kam kiba dang sahteng la slem bha.
Ha kaba sdang, u Rupak Saha, Senior Deputy Accountant General (Administration), u la pdiang sngewbha ïa ki Drawing and Disbursing Officer (DDO) bad kiwei kiwei kiba don bynta ha kane ka kam bad u la ban jur ïa ka jingdonkam jong ka jingïatreilang hapdeng ki bor ba dei peit na ka bynta ban pynbeit ïa ki case ha ka por kaba biang.
Kane ka Adalat ka kynthup ïa ki case na ki ophis jong ka Sorkar Jylla kiba don ha ki district jong ka South West Khasi Hills bad West Khasi Hills. Ki nongïoh bai bam tymmen, ki DDO kiba dei peit bad ki ophisar kiba don bynta ha kaba pynïaid ïa ki case ki la ïashim bynta ha ki jingbishar.
La bishar ia kawei pa kawei ka case, da kaba pynshisha ia ki jingtip bad ki kot ki sla kiba la pynshisha. Ki ophisar jong ka Ophis u Accountant General ki la ai jingmut ia ka Tnad kam pla tyngka bad ki DDO halor ka jingpynbeit ia ki kam kiba eh katkum ki kyndon bad ki rukom treikam kiba iahap.
Ha ki jingbishar, la ïohi ba ka jingpynslem ha ki katto katne ki case ka dei namar ka jingduna ki kot ki sla bad ki phorm ba donkam ki bym shym la ai ha ka por ba ki nongtrei ki dang trei. La iakren ruh ia ka jingdonkam ban pynpoi ia ki kot ki sla kiba donkam ha ka por kaba biang bad ki jingeh kiba ki nongioh bai bam tymmen ki iakynduh namar ka jingpynslem ban pyntreikam.
Ki ophisar ki la ban jur ïa ka jingdonkam ba ka Tnad kam pla tyngka kan pynkhlaiñ ïa ka jingpynsngewthuh bad ban pynmih ïa ki jingbthah kiba donkam sha baroh ki DDO, ki heh duh jong ki ophis bad ki heh duh jong ki tnad ban pynthikna ba ki case ki long kiba pura ha baroh ki bynta lyngba ka rynsan e-Pension.
La ai jingmut ia kito kiba don bynta ha kane ka kam ban pyndonkam pura ia ka lad online bad ban bud ia ki kyndon ba la buh khnang ban pynsuk ia ka jingai ia ki jingmyntoi kiba iaid beit iaid ryntih bad ha ka por kaba biang.
Hapoh ka sienjam Open Window jong ka, ka Ophis jong u Accountant General (A&E), Meghalaya, ka pdiang sngewbha ïa ki nongïoh bai bam tymmen bad kito kiba don bynta ha kane ka kam ban leit sha ki jaka ba dei peit hapdeng ka por 10:00 Mynstep bad 1:00 Nohphaisngi man la ka sngi Thohdieng na ka bynta ban ïoh jingshai halor ki kam bai bam tymmen bad ban pynbeit ïa ki jingeh.
Kane ka Adalat ka la ioh ka jingiaroh na ki nongioh bai bam tymmen kiba la iashim bynta, ki DDO bad kiwei kiwei kiba don bynta ha kane ka kam kum ka sienjam kaba bha ban weng ia ki jingeh bad ban pynkhlain ia ka jingtreikam kaba paka, kaba shai bad kaba shimkhia ia ka jingshakri paidbah ha Meghalaya.
