Shillong, Risaw 08: Ka sorkar Meghalaya mynta ka sngi 08/Risaw/2026 kala plie ia ka ‘Command and Control Centre’ ha ophis ka tnad sam bam sam dih bad la leh ia kane ban pyntikna ba ia u khaw ration u ba ka sorkar ka sam sha ki paidbah ki nongkit ki dei ban pynpoi sha ki jaka kiba la mang.
Ka jingplie ia kane ka ‘Command and Control Centre’ ka long ban peitngor ia ka leit ka wan jong ki kali kiba kit ia u khaw ba kin nym jah lynti ne pynslem ha lynti, ia baroh ki kali ba kit khaw yn pyndait da u GPS Tracking System da kaba leh kumne ka ophis kan peitngor ia ka jingleit ki kali kiba kit ia u khaw.
U Sanjeev Chopra IAS, Secretary ka tnad sam bam ka sorkar pdeng haba kren ha ki lat pathai khubor u la ong ba u la wan ban iashim bynta ha ka jingialang ki ophisar ka tnad sam bam ki sorkar jylla ka thain Shatei Lammihngi kaba long ha Shillong bad ha kajuh ka por ban sakhi ia ka jingplie ia kane ka ‘Command and Control Centre’ ka tnad sam bam ia kaba u la ioh ban plie mynta ka sngi.
U la ong ba ka jingdon ia kane ka jaka ban peit bniah ia ki kali kit mar bam ka long ban pyntikna ba baroh ki trok kiba kit ia u khaw kin poi sha ki jaka ba la mang khlem da pynbakla lynti namar ha kine ki trok yn sa pyndait ia ki GPS Tracking System kane ka long ban pyntikna ba kin poi sha ki jaka ba la mang.
La leh ia kane khnang ban pynlait na ki jingkynnoh kiba la ju mih na ka por sha ka por ba ki kali kit khaw kim poi sha ki jaka ba dei ban poi ne sha ki dukan sam mar bam da kaba leh kumne ki ophisar ka sorkar jylla ki lah ban bud dien ia ki kali bad lada ki leh bakla kin shah pynshitom katkum ka ain kiba la ia don lang ha kane ka jingialang ki long ka Smti. Anita Karn Additional Secretary ka tnad sam bam ka sorkar pdeng bad ki Secretary ka tnad sam bam ki sorkar jylla na ka thain Shatei Lammihngi ka ri India.
