Shillong, Risaw 8:Ka St. Joseph’s Secondary School, Laitkor, East Khasi Hills, ka rakhe iaka spah snem (1926–2026) jong ka, ha kaba la pynlong iaka rynsan kynmaw burom ban ai burom bad pynkup burom iaki nonghikai, ki nonghikai barim bad ki khynnah skul barim jong ka.
Ia katei ka prokram, la don u Myntri ka pule puthi, u bah Lahkmen Rymbui kum u kongsan, ha ka jingiadon lang u bah A.L. Hek, MLA, Fr. Francis Kharpran, ki nonghikai, nonghikai barim, ki kmie ki kpa bad khynnah skul. Ha kane ka prokram, ka don ka jingpyni shad da ki khynnah skul bad kane ka pynpaw iaka jingdap shispah snem kane ka skul kaba la slem bad ka jingnoh synniang ha ka pule puthi.
Ha katei ka prokram, u bah Lahkmen Rymbui u la ong ba ka pule puthi kam dei tang ban ioh kam sorkar hynrei ka dei ka atiar ban trei shitom ban tur iaki jingeh ba wan ha ka jingim briew bad ban shaniah ha lade. U la ban jur halor ka jingdonkam jong ka jingithuh bad ka pynroi iaka sap kyrpang lang bad ka jingnang jingstad.
U bah Rymbui u la kren shaphang ka jingsdang jong ka sorkar Meghalaya ban ai lad iaki samla ba kin pynpaw la ki sap jong ki bad pynshlur iaki khynnah pule bad kin wad iaki sap jong ki, katba u la ong ba dei ban kamai iska hok. U la kyrpad iaki nonghikai bad kin bteng ban wad iaki lad thymmai bad pyntbit ialade ha ka jingpeit bniah ia kane ka pyrthei ba bun ki jingkylla bad ki buit thymmai jong ka teknologi.
Katba u bah A.L. Hek kum u kongsan, u la ai jingiaroh iaki nongshem kane ka skul kiba la wallam iaka jingshai jong ka jinghikai sha Laitkor bad u la pynshlur iaki khynnah pule bad kin long kiba iai minot, kin long kiba iai shah haba ki mad jingeh bad sngewthuh ia la ka bor bad jinglah.
Kane ka jingrakhe iaka jingdap shispah snem kane ka skul ka pynkynmaw ia u mawjam ba kongsan ha ka histori jong ka St. Joseph’s Secondary School, kaba la ai burom iaki bynta ba la dep katba kala ai mynsiem iaki pateng ba mynta bad kin rah shakhmat iaka pateng jong ka jinghikai bad jingshakri.
