Shillong, Risaw 8: Ka Meghalaya Teacher Training Academy (MTTA) bad ka Bharti Airtel Foundation mynta ka sngi kala dep soi iaka Memorandum of Understanding (MOU) na ka bynta ban pynroi iaka jingtip kaba janai jong ki nonghikai ha baroh ka jylla lyngba ka The TeacherApp. La pynlong ia kane ha ka kamra kabinet, Main Secretariat Building, Shillong bad la don lang u bah Lahkmen Rymbui, uba dei u Myntri ka pule puthi ka sorkar Meghalaya.
La don lang u Vijay Kumar Mantri, IAS, Commissioner & Secretary, tnad pule puthi, sorkar Meghalaya; ka kong Jacqueline Una Kharpuri, MCS, Director, Meghalaya Teacher Training Academy; bad na Bharti Airtel Foundation, la don u Binu Nair, Chief Operating Officer bad u Kumar Ashutosh, Regional Head, ryngkat ki heh nongtrei na ka tnad pule puthi, MTTA bad ki Directorate.
Lyngba kane ka The Teacher App, ka dei ka rynsan kaba bit ban pyndonkam haki kam pule khlem da siew dor na ka Bharti Airtel Foundation kaba iarap bad kyntiew iaki nonghikai. Lyngba kane, ki nonghikai ha Meghalaya kin ioh lad ban pyndonkam iaki lynti pule kiba lah ban leh, ki webinar ba ia donlang bad ki riew shemphang, ki tiar Al na ka bynta ban pynkhreh lynnong bad eksam, ki kynhun jingiarap hapoh klas, ki thup jingkylli, bad ka lad ban ia donlang bad ki para hikai kiba bun hapoh ka imlang sahlang.
Da kaba shna halor ar phew snem tam ka jingiaid lynti kane bad ka jingiadei bad ki mat kaba hakhmat eh jong ka National Education Policy 2020, Ka TheTeacherApp ka wanrah lang iaki lad jingiarap ba khia, ka jingiasyllok paralok nonghikai lyngba ka Teachers’ Lounge bad ki tiar wad jingtip AI kiba lah ban pynbiang bad pynkylla ban iarap iaki nonghikai ban pynkhlain iaki rukom hikai ha klas bad ban pynjanai iaka rukom nang rukom stad jong ki khynnah skul. Mynta kane ka rynsan kala poi sha lympung palat 3.25 lak ki nongpyndonkam ha baroh 36 tylli ki jylla bad Union Territories da ka jingiasnohkti lang bad ka NITI Aayog bad ki sorkar jylla.
U bah Lahkmen Rymbui, Myntri ka pule puthi jong ka sorkar Meghalaya u la ong ba ka jingpyn kup bor iaki nonghikai lyngba ka jingioh jinghikai ba bteng kan long ka phang pdeng ha kaban pyntbit iaka jingkyntiew iaka rukom pule puthi ha ki skul. Katba ka jingdon ki rynsan teknologi kum ka The TeacherApp kan pynioh iaki nonghikai ka jylla Meghalaya ka lad jingai jinghikai bad jingpynbit kiba iadei, kiba suk ban ioh bad kiba thikna bad ki thup katkum ka jingdonkam, kiba pynjanai ne pynbiang iaki rukom hikai hapoh klas.
U Binu Nair, Chief Operating Officer, Bharti Airtel Foundation, u la ong ba ki nonghikai ki don iaka bynta ka bakhraw ha kaban pyn wan dur iaka lawei jong ki khynnah pule. Lyngba ka TheTeacherApp, kan long ka jingkyrshan na ka bynta jong ki nonghikai ha kaba kin ioh ka lad ban bteng ka jinghikai jong ki, ki tiar ki tar ba donkam hapoh ka klas bad kiwei kiwei ki lad ne buit thymmai kiba lah ban iarap iaki khynnah pule bad kin nang kiew ha ka kam bad ban nang pynbha pyn janai iaka jingpule jong ki khynnah.
U la sngewnguh iaka sorkar Meghalaya bad ka Meghalaya Teacher Training Academy na ka bynta ka jing ialam lynti ka jong ki bad ka jingiatreilang jong ki ha kaban pynkiew shaphrang iaka jingroi ha ka kam hikai jong ki nonghikai.
Kane ka jingiatreilang kum shi paralok ka pynthikna iaka jingkular jong ka sorkar Meghalaya, MTTA bad ka Bharti Airtel Foundation ba kin pynbha bad pynkhlain iaka bor hikai jong ki nonghikai bad pynroi iaka jingnang jingstad kaba khuid lyngba ka jingpule ba iai neh bad ka jingpyndonkam kaba biang iaka bor teknologi ha ki kam pule puthi.
