Shillong, Risaw 8: Ka tnad jong ka Nanotechnology, North-Eastern Hill University (NEHU), Shillong, kala pynlong da ka jinghikai ba shi sngi halor ka jingshem iaki kynja dawai da ka bording na ka bynta ban rakhe iaka Nanotechnology Day.
Ia katei ka projek, la pyniaid ha ka jingiatreilang bad ka Class One Systems S&T Pvt. Ltd. (PalmSens) bad la don lang ki dkhot nongtrei, riewshemphang, stad wad bniah bad ki samla pule ba kin ia wad bniah shaphang ki katto katne kita ki nanotechnology kaba mut ka jingstad kaba pyndonkam iaki symboh kiba rit bha bad ki kor ki bor kiba teh lakam iaki jingkylla ba nyngkong lyngba ka bor electricity bad chemical, ha kaba ki dei ki lat thymmai kiba la wanrah iaka jingkylla kaba khraw ha ki lad ba nyngkong ban bishar bad teh lakam iaki jait jingpang, ka mariang bad ki mar bam mar dih.
U Prof. S. K. Barik, Vice-Chancellor-in-Charge ka NEHU, u la long kum u kongsan ha katei ka prokram. Katba ka Dr. Shruti Shukla, Head, Department of Nanotechnology, NEHU, kala kren shaphang ka jingdonkam jong ki nanotechnology ha kane ka juk saian ba mynta bad ka jingiadei bad ki sobjek kynthup iaka Physics, Chemistry, Biotechnology bad kiwei kiwei ki bynta jong ka Engineering.
Kala ban jur halor ka jingwad bniah bad ka jingroi jong ki buit thymmai kaba la shim da ka tnad bad kala ong ba ka long kaba donkam ban pynshai shaphang ka lad nanotechnology hapdeng ka imlang ka sahlang bad kane ka pateng jong ki khun samla.
Ka Dr. Shukla kala pynshai ruh shaphang ka jingbun jong ki nanotechnology bad nanoscience ha ki jaka kynthup iaki dawai dashin, ka rep ka riang, tiar bording bad kiwei ki bynta ba dang mih thymmai, ban pynshai ba kane ka lad ka don ka bor ban pynbeit iaki jingeh kiba mih ha ka imlang sahlang bad ha ka mariang ban kyntiew iaka teknoloji ha kane ka juk mynta.
Ha katei ka prokram, u Prof. S. K. Barik, Vice-Chancellor-in-Charge bad u kongsan u la iaroh ia kane ka tnad jong ka Nanotechnology na ka bynta ka jingpynlong ia kane ka projek bad pynkynmaw iaka Nanotechnology Day.
U la pynshai iaka nanotechnology kum ka teknologi jong ka lawei ban wan kaba donkam ruh ka jingiatreilang hapdeng ki stad wad bniah kiba wad bniah iaka saian naduh tyllong bad ki tnad jingtreikam ka sain teknoloji na ka bynta ban thaw ki lad ki lynti ban weng iaki katto katne ki jingeh kiba khraw kiba ka pyrthei ka iakynduh mynta.
U Prof. Barik u la peit thuh ba ka nanotechnology kala nang long kaba donkam eh ha kylleng ki bynta jong ka saian bad teknologi. U la ban jur ba ka jingwad bniah kaba ym dei tang ban shu kut lane shah khang hapoh ki kot ki sla lane ki jingpyn mih kot kiba iadei bad ka pule dangle, hynrei ka dei ban ialam pynban sha ki mar ki mata bad ki kor ki bor ki ban pynmyntoi iaka imlang sahlang.
U la ai jingiaroh iaka tnad Nanotechnology na ka bynta ka jingtrei shitom jong ka ban nym sangeh kane ka jingwad bniah lem bad ka jingpyn leit jingmut halor ki kam kiba lah ban pyndonkam bad ka jingbha ne jingsniew halor ka imlang sahlang.
Ha kane ka prokram, ka don bun ki bynta jong ka jingiakren shaphang ki teknikal bad ka jingialang jingiakren da ki riewkhraw ka pule dangle bad ki riewshemphang ha ki kam karkhana, u Prof. Arup Jyoti Baruah, North Eastern Indira Gandhi Regional Institute of Health and Medical Sciences (NEIGRIHMS), Shillong, uba la kren halor ka jingpyn iadei hapdeng ka nanotechnology bad ki dawai, ha kaba u la ong ba ka jingroi jong ka jingnoh synniang ka buit nanotechnology sha ka koit ka khiah bad ka rukom pyndonkam iaki tiar lane ki lad saian ban pynkhiah bad ban sumar iaki jingpang.
Katba ka jingbatai da u Anshuman Mallick, Technical Director jong ka Class One Systems S&T Pvt. Ltd. (PalmSens), uba la kren halor ki electrochemical sensing platforms kaba mut ki rukom treikam bad ki tiar ban teh lakam bad ban buh jingkhein iaka jingmih ding bad ki dawai ki kynja chemical bad ki rukom pyndonkam iaki har rukom ki bynta jong ka saian bad ka teknoloji.
Ka jingai jinghikai bad jingpyni da kaba ktah bad pyndonkam hi da ki kti halor ki tiar electrochemical sensing la pyniaid da u Animegh Mondal, Class One Systems S&T Pvt. Ltd. (PalmSens). Kane ka sngi ai jinghikai kam kala pynlong iaki samla pule bad ki stad wad bniah ban ioh ka jingshem bad jingtip hi da la ki khmat bad ki kti halor ki rukom treikam bad ki jingpyndonkam iaki kor electrochemical sensing.
U Dr. Davidson Pyngrope, Department of Nanotechnology, NEHU, u la pyni ruh iaka jingiaid lynti bad jingiar jong ka tnad Nanotechnology ha NEHU. U la pynpaw bniah iaki kor ki bor bad ki jaka wad jingtip ba shakhmat (R&D) ba don ha kane ka tnad, kiba dei ki jaka ba kyrpang tam ha kane ka thain bad u la pyni ruh iaki lad wad jingtip ba kongsan ba la ialam khmat da ki nonghikai bad ki riewwad jingtip.
U Dr. Pyngrope u la pynshlur ruh iaki samla pule ba kin pyrkhat ban leit wad jingtip shuh shuh ha ka M.Tech. prokram ha ka Nanotechnology ha NEHU, da kaba pynpaw bniah iaki lad jingiar ba nang khie kiba donkam ha kane ka bynta bad ka jingpynbit pynbiang ha ki bun ki jait jingpule lyngba kane ka prokram.
