Shillong, Risaw, 14: Ha ka jingkyrshan ka bakhraw iaka jylla Meghalaya, yn sa pynlong iaka 5th KIO North East Zone Karate Championship 2026 ha kane ka nongbah Shillong naduh ka 22 haduh 24 tarik Risaw.
Ia katei ka jingialehkai, la pynlong da ka Karate India Organisation (KIO), ha kaba la pyniaid pat da ka All Meghalaya Karate-Do Association (AMKA) bad kyrshan da ka Directorate of Sports and Youth Affairs jong ka sorkar Meghalaya. Katei ka jingialehkai ban neh lai sngi, kan sa long ha Convocation Hall of North-Eastern Hill University (NEHU) Shillong.
Yn sa don ki nongiashim bynta ba dei ki nongialehkai karatekas kiba wan na kylleng ka thain lam mihngi ka Ri India, kaba kan sa dei kawei na ki rynsan bakhraw na ka bynta jong ki samla iakehkai kiba thrang ban long ki nongialehkai karate kiban pyni la ki sap jong ki, kiba don iaka mynsiem ia kop, ka jinglong ryntih bad ka jinglong iakehkai.
Ha katei ka jingialehkai, yn sa sakhi ia 899 ngut ki nongialehkai karate, ki coach, referee bad ki heh jong ka kynhun kiban long ki nongmihkhmat na ki thain jong ki jylla bapher bapher ha katei ka lympung iakop.
Kane ka lympung iakop ruh ka thmu ban pyniar bad pynskhem iaka jingialehkai karate ha kane ka thain lam mihngi, da kaba pynshlur iaka jingbit ha ka jingialehkai hapdeng ki samla iakhun bad ai iaki iaka mynsiem iakop ha ki bynta jong ka zonal. Kan long ruh ka lad ba kongsan na ka bynta jong ki nongialehkai ba kin pyntbit bha ialade bad pynkhreh na ka bynta ki jingiakop ha ki kyrdan ba nyngkong, kum ka 39th National Games, kaba ka jylla Meghalaya kan sa pynlong la shem snem.
Katba ki nongialehkai jong ka AMKA kila wanrah burom ha ka jylla ha kiba bun ki jingialehkai iakop ha ki snem ba la dep ha la ki thain bapher bapher jong ka jylla, kynthup iaki jingiakop hapoh jylla bad shabar ka jylla.
Hynrei ki nongialehkai karate kiba wan ha ka kyrdan ba nyngkong na Meghalaya kin wad lad ban pynwan biang ia kito ki jingjop bakhraw ba kila ioh na kiwei pat ki jaka ha la ka jong ka ri, ryngkat ka jingkyrshan jong ki lok ki jor, ka longing longsem bad ki nongkyrkhu kyrdoh bad ki nongkit bok kot rwiang.
