Shillong, Risaw 21: Ka Hynñiewtrep Youths’ Council (HYC), Umwai Unit ha ryngkat ki paidbah Nongshong Shnong,ha ka 20 tarik u Risaw 2026, ha ka por kumba 6:30 janmiet, ki la ioh bat ia uwei u briew na ka shnong Umwai, namar ka jingsuba ba u dei u nong Bangladesh bad ba u la rung tuh shapoh ka ri India.
Ha ka por ba la tohkit ia une u briew, la lap ba um dei satia u nong India hynrei u lah wan rung tuh sha India. Namar kata, ka HYC Umwai Unit ka la shim ia ki sienjam kiba donkam bad hadien kata ka la aiti noh ia une u briew sha ki bor pyniaid ain kiba dei khmih, khnang ba kin pynshisha ia ka jinglong jong u, ka ri kaba u dei bad ban leh ia kaba donkam katkum ka aiñ.
Ka Seng ka ngeit ba ka jingpeitngor pyrshah ia ki kam rung tuh sha ka ri ka long kaba donkam, bad ka kyntu ia ki bor ba dei khmih ba kin tohkit bniah ia kum kine ki jingjia bad ban shim ia ki sienjam katkum ka aiñ lada lap ba la don ka jingpynkheiñ aiñ.
Ka Seng ka kyntu ruh ia ki paidbah ban long kiba peitngor bha namar ka jingrungtuh jong ki Khar Bangla kan ktah ia ka shongsuk shongsain jong ka Jylla bad Ka Ri hi baroh kawei lada ym tehlakam ia ka.
