Shillong, Risaw 20: U myntri rangbah ka jylla u Conrad K Sangma u la plie paidbah ia ka ophis ba thymmai jong ka Rerapara Community & Rural Development Block ha ka jingiadon lang ka Mehtab Chandee A Sangma, u Subir Marak bad u Sanjay Sangma baroh lai ngut ki dei ki MLA.
Ha ka sngi ba plie ia ka ophis ba thymmai jong ka block u myntri rangbah u ai khublei ia ka Nokma ka Rerapara kiba la ai ei ia ka jaka da kaba kylluid mynsiem, ha kane ka sngi la buh mawnongrim ban shna ia ka surok AMPT Road na Garobadha sha Tura bad la plie ruh ia ka jingkieng iaid kjat ha Samandalgre, Rerapara.
Ka ophis jong u BDO ka dei ka ophis kaba don kam tam haba ai ki jingshakri ia ki paidbah ha ki nongkyndong, ka secretariat ka dei ka ophis ba ha khliehduh, hynrei ka ophis jong ki Block ki long kiba don bha namar ia ki skhim baroh lyngba jong ki block.
La ong ba mynshuwa 75% ki ophis jong ki block la shong ha ki iing wai bad ka rukom treikam kam biang namar bymbiang ki kamra, ban shna ia ki ophis jong ki Block ka sorkar kala mang T.200 klur tyngka na ka bynta ka ka kam ban pynbha ia ki Block.
Ha ka juh ka rukom ka sorkar kala shna pynbha 2000 tylli ki iing skul ba dei jong ka sorkar, la shna pynbha ki Police Station, ki Kolej, kum ka Captain Williamson Sangma College College ha Baghmara, Williamnagar College bad Nongstoin College.
U Myntri Rangbah ka kylla u kyntu ia ki nongtrei sorkar ba kin aiti ia lade ban trei na ka bynta jong ki paidbah da ka mynsiem sngewrit, da ka jingshaniah bad ka jingieit ia ki para briew. Ha kane ka sngi la don lang ki Nokma ban ia shakhi lang ia ka jingplie ia ka ophis ba thymmai jong ka Block.
