Shillong, Risaw 29: Ka long kaei kaei kaba sngewtynnad ba ka kong Philtiris Nongbisaw da ka jingtrei shitom jong ka mynta la kumba khatsan snem ei ei ha ka kam thung syntiew kala kylla long ka nongaikam ha kane ka kam thung syntiew bad mynta kala ioh ia ka jaka ha DIC North Eastern Hill University ban pynheh shuh shuh ia kane ka kam.
Haba iakren bad u SP News Agency ka Philtiris kala iathuh ia kane ka kam thung syntiew kala ai da ka kyrteng ‘S.Nongbisaw Garden’ la iathuh ba kala trei hapoh jong ka Botanical Survey jong ka sorkar pdeng hynrei kala iehnoh na ka kam bad ka sdang ban thung noh ha iing ha Mawtawar.
Ha ka jingiaid lynti ha kane ka kam thung syntiew kila ia trei shikmie shikhun bad ka kam kala iaid bad ha kine ki snem kila ioh la lad ban leit pyninam ia ki syntiew ha kylleng kiba juh pynlong la ka dei jong ka sorkar ne jong ki shipai ne kiwei ruh ki juh leit ban ia shim bynta.
Haba ia dei bad ka jingpyniaid iew la iathuh ba bun ki nongdie syntiew ki wan thied na iing bad ki don ruh ki riew shimet kiba la wan thied na iing sah jong ka bad kane kala iaid kala tyllun ha kine ki snem kiba la dep bad kane ka jingtrei shitom kam shym ka sep ei bad mynta kila ioh ia ki iing ha NEHU ban thung syntiew.
Haba phai sha ka iew syntiew ha kane ka nongbah Shillong kala ong ba bun u syntiew ot u wan na Bangalore bad da ka jingai jong ka NEHU ia kane ka jaka kan thung noh bad lehse kin lah ban die ha ka dor kaba kham duna haba la pynmih nangne na Shillong.
Kala ong ba ha kine ki iing kiba ka NEHU kala ai kan thung kyrpang ia ki syntiew kiba la jan duh jaid na ka jingpom pathar ia ki khlaw ki btap, kan thung ia ki syntiew bad ki dieng dawai ba kan long ruh ka jaka wad bniah ia ki samla pule.
Ka samla Ribenlang Nongbisaw kala khot la wer ia ki briew ba ieit syntiew ki lah ban leit peitkai ia kane ka jaka thung syntiew bad ki lah ban ai ka jingkyrshan da kaba thied ruh ia ki bad kumba ka long mynta kim lah shuh ban trei tang shi iing kila ai kam ruh ia kiwei ha kane ka kam thung syntiew bad baroh kiba iatrei mynta kila don phra ngut baroh.
