Shillong, Nohprah 3: Ha ka 8/Risaw/2012, na ka liang jong ka ophis jong u Superintendent ki pulit ka East Khasi Hills district, Shillong, u bah Vivek Syiem u la ong ba la ioh jingtip ba la iohpdiang iaka jingujor ha Cantonment B.H ba u bah Charles Marbaniang u la dung da ka kynja tiar ba nep ia uwei u briew uba dei u para jong u nongujor ha kaba u la khlad noh na ka jingmynsaw.
La ong ba ia katei ka jingujor, la rejistar da ka mukotduma ha Sadar P.S Case No. 174(10)2012 u/s 304 Part-I IPC. Ia kane ka jingjia, la dep tohkit bad la kem noh ia u bah Charles Marbaniang. Hadien ba la dep ka jingtohkit, na ka liang jong u ophisar ba tohkit ia kane ka jingjia u la dep ujor da ka Charge Sheet vide CS No. 108/2013 ha ka 1/Naitung/2013 u/s 302 IPC.
Katba ha ka 22/Risaw/2026, ka iing kashari jong u bah B. Laitmon, District bad Session Judge, East Khasi Hills, Shillong u la kynnoh ba ia u bah Charles Marbaniang, la pynngat ha ka Session Case No. 33 jong u snem 2016 ha Sadar P.S Case No. 174(10)2012 u/s 304 Part-I IPC. La ong ba u bah Marbaniang u la dep shah set phatok shi bnai bad 29 sngi.
Kumta un shah set phatok sa kumba 4 snem, 10 bnai bad shi sngi lem bad ka jingshah dain kuna haduh T. 30,000/- hapoh ka kyndon 304 Part I IPC bad lada um lah ban siew iaka kuna, un shah set phatok sa lai bnai.Ia kane ka jingjia, la tohkit da u UBSI. R. Ranee uba don ha thanad Mawdiangdiang, Shillong.
